ئەنجوومەنی ڕاژەی گشتیی حکوومەتی هەرێمی کوردستان ڕایگەیاند، کە قۆناغی پڕکردنەوەی فۆڕمی ئەلیکترۆنی بۆ داواکاریی دامەزراندن لە سنووری پارێزگای هەڵەبجە کۆتایی هاتووە. بەپێی ئامارە فەرمییەکان، کۆی گشتیی ئەو کەسانەی فۆڕمەکەیان پڕکردووەتەوە گەیشتووەتە 9,006 داواکار.
ئەم ژمارە زۆرەی داواکاران کێبڕکێ دەکەن بۆ بەدەستهێنانی تەنها 250 پۆستی کار لەسەر میلاکی گرێبەست، کە بۆ فەرمانگەکانی حکوومەت لەو پارێزگایە تەرخانکراون. پۆستەکان 32 پسپۆڕیی جیاواز لەخۆ دەگرن، ئەمەش وای کردووە پڕۆسەکە ئاستێکی بەرزی کێبڕکێ بەخۆوە ببینێت.
ئەنجوومەنی ڕاژەی گشتی ئاماژەی بەوە کردووە، کە بۆ شەفافیەتی زیاتر و بەرچاوڕوونیی داواکاران، چەند داتایەکی سەرەکی لە چوارچێوەی ڕاپۆرتێکی شیکاریدا بڵاو دەکەنەوە. جەختیش کراوەتەوە کە تەواوی پڕۆسەکە بە هەماهەنگیی ڕاستەوخۆ لەگەڵ پارێزگای هەڵەبجە بەڕێوە دەچێت بۆ دڵنیابوونەوە لە دادپەروەری لە دابەشکردنی پۆستەکاندا.
کارکردن لەسەر وردبینی و هەڵسەنگاندنی فۆڕمەکان بەردەوامە و بڕیار وایە ئەنجامی قۆناغەکانی داهاتووی پڕۆسەی دامەزراندنەکە لە ڕێگەی ماڵپەڕی فەرمیی ئەنجوومەنی ڕاژەی گشتییەوە بە فەرمی بۆ ڕای گشتی بڵاو بکرێتەوە.
