ڕاپرسی و ئاماژە سەرەتاییەکان دەریدەخەن کە ئەگەری هەیە دیموکراتەکان کۆنترۆڵی یەکێک لە ئەنجومەنەکانی کۆنگرێس یان هەردووکیان بەدەستبهێننەوە؛ بەدەستهێنانی زۆرینەی ئەنجومەنی نوێنەران لەلایەن دیموکراتەکانەوە دەسەڵاتێکی باڵایان لە دۆسیەی بودجەی فیدراڵیدا پێدەبەخشێت، هاوکات لەدەستدانی زۆرینە لەلایەن کۆمارییەکانەوە، دوو ساڵ بەر لە کۆتاییهاتنی خولی سەرۆکایەتییەکەی، کارنامەی یاسادانانی ترەمپ لە کۆشکی سپی تووشی ئاستەنگی و چەقبەستوویی دەکات.
لە هەڵبژاردنەکانی ئەمڕۆدا، کاندیدەکان کێبڕکێ لەسەر سەرجەم 435 کورسییەکەی ئەنجومەنی نوێنەران و 35 کورسی لە کۆی 100 کورسیی ئەنجومەنی پیران دەکەن، هاوتەریب پۆستی پارێزگاری 36 ویلایەتیش یەکلا دەکرێتەوە. بەپێی هاوکێشەی دەنگەکان، دیموکراتەکان تەنیا پێویستیان بە بەدەستهێنانی 3 کورسی لە ئەنجومەنی نوێنەران و 4 کورسییە لە ئەنجومەنی پیران تا بتوانن زۆرینەی هەردوو ئەنجومەنەکە لە چنگی کۆمارییەکان دەربهێنن.
سەرەڕای ئەوەی ترەمپ لە دەستپێکی خولی دووەمیدا بەڵێنی کەمکردنەوەی نرخەکان و بووژانەوەی ئابووریی دابوو، بەڵام کێشەی هەڵاوسان، سەپاندنی پێناسی گومرکی و بەرزبوونەوەی نرخی سووتەمەنی بەهۆی ململانێکانی ڕۆژهەڵاتی ناوەڕاستەوە، فشاری دارایی بەرچاویان لەسەر بژێویی خێزانە ئەمەریکییەکان دروستکردووە، ئەمەش کێبڕکێی هەڵبژاردنەکانی ئەمڕۆی بۆ پارتی کۆماری سەختتر کردووە.
