بەپێی هەواڵێکی ئاژانسی "تەسنیم"، عەباس عەراقچی نووسیویەتی: "سەرۆکی ئەمەریکا بە ڕوونی لەوە تێگەیشتووە کە زۆرینەی هەرە زۆری گەلی ئەمەریکا بە توندی ڕقیان لە ئیسرائیلە، بەڵام جێگەی سەرنجە تا ئێستاش لە هۆکاری ئەم بابەتە تێنەگەیشتووە".
وەزیری دەرەوەی ئێران دەشڵێت: "ئاشکرایە ئەمەریکییەکان بێزار بوون لەوەی ئیسرائیل بەردەوام فێڵ لە حکوومەتەکانی ئەمەریکا دەکات و پاڵیان پێوە دەنێت بەرەو شەڕە بێکۆتاکان، ئارامیی ئەوان تەواو بووە، و دۆخی ناوچەکەی ئێمەش ڕێک بە هەمان شێوەیە".
ئەم لێدوانەی عەراقچی دوای ئەوە دێت کە سەرۆکی ئەمەریکا لە چاوپێکەوتنێکیدا لەگەڵ تۆڕی (CBS) بە ئاشکرا دانی بەوەدا نا، ناڕەزایەتیی دەنگدەران لە شەڕی ئێران، بەرزبوونەوەی نرخی بەنزین، لەگەڵ ناڕەزایەتییە بەرفراوانەکان دژی ئیسرائیل، لە هۆکارە سەرەکییەکانی شکستی کۆمارییەکان بوون لە هەڵبژاردنە نیوەکارییەکاندا.
