سەرۆکی حکوومەت لە نامەیەکدا، پیرۆزباییەکی گەرمی ئاراستەی بەڕێوەبەرایەتی و سەرجەم کارمەندانی کۆمپانیای "زۆم" کرد بە بۆنەی بەدەستهێنانی خەڵاتی نێودەوڵەتیی (2026 Consumer GRANDS PRIX) لە شاری پاریسی پایتەختی فەرەنسا، کە لەلایەن گرووپی جیهانیی بەناوبانگی (TOP COM) پێیان بەخشراوە.
مەسرور بارزانی لە پەیامەکەیدا، ستایشی ڕۆڵی بەرچاو و کاریگەری کۆمپانیای زۆمی کرد لە بووژانەوەی کەرتی بەرهەمهێنانی خۆماڵی، ڕەخساندنی دەرفەتی کار بۆ گەنجان، پاڵپشتیکردنی گوندنشینان و سامانی ئاژەڵی و بەرزکردنەوەی ئاستی کوالێتیی بەرهەمی نیشتمانی لەسەر ئاستی جیهانیدا.
هاوکات، سەرۆکوەزیرانی هەرێمی کوردستان جەختی لەسەر بەردەوامیی پشتیوانی و هاوکارییەکانی حکوومەت بۆ پڕۆژە نیشتمانییەکان کردەوە، وەک بنەمایەکی سەرەکی بۆ هەمەچەشنکردنی ئابووری، پەرەپێدانی کەرتی پیشەسازی و ناساندنی زیاتری بەرهەمە ناوخۆییەکان لە بازاڕ و پێشانگە نێودەوڵەتییەکاندا.
