ئەنجوومەنی وەزیرانی هەرێمی کوردستان، بە فەرمی بڕیاری دا کەمترین بڕی مووچەی مانگانەی خانەنشینی بۆ کرێکارانی کەرتی تایبەت دیاری بکات، ئەمەش وەک هەنگاوێک بۆ هاوتاکردنی مافە داراییەکانی ئەو توێژە لەگەڵ پێوەرە گشتییەکان.
بەپێی بڕیاری ژمارە (297)ی ئەنجوومەنی وەزیران، کە لە ڕێکەوتی 24ی حوزەیرانی 2026 بە ئیمزای مەسرور بارزانی، سەرۆکی حکوومەتی هەرێمی کوردستان دەرچووە، پێشنیاری وەزارەتی کار و کاروباری کۆمەڵایەتی پەسەند کراوە بۆ جێگیرکردنی کەمترین بڕی مووچەی خانەنشینی کرێکارانی کەرتی تایبەت بە بڕی 500,000 (پێنجسەد هەزار) دیناری عێراقی.
ئەم بڕیارە پشت بە حوکمەکانی ماددەی هەشتەم لە یاسای ئەنجوومەنی وەزیرانی هەرێم و یاسای خانەنشینی یەکگرتوو بەستراوە. حکوومەت هەردوو وەزارەتی (کار و کاروباری کۆمەڵایەتی) و (دارایی و ئابووری) ڕاسپاردووە کە ڕێنمایی پێویست بۆ ئاسانکاری و جێبەجێکردنی ئەم بڕیارە دەربکەن.
ئەم هەنگاوەی ئەنجوومەنی وەزیران وەک دەستکەوتێکی گرنگ بۆ کرێکارانی کەرتی تایبەت دەبینرێت، کە پێشتر بڕی مووچەکانیان لە ئاستێکی نزمتردا بوو. شارەزایانی ئابووری پێیان وایە دیاریکردنی ئەم بڕە (500 هەزار دینار) هاندەرێکی باش دەبێت بۆ گەنجان تاوەکو ڕوو لە کەرتی تایبەت بکەن، چونکە دڵنیایی دەداتێ کە لە کاتی خانەنشینبووندا بژێوییەکی شایستەیان بۆ دابین دەکرێت.
بڕیارەکە لە ڕۆژی دەرچوونییەوە جێبەجێ دەکرێت و لە ڕۆژنامەی فەرمیی (وەقایعی کوردستان) بڵاو دەکرێتەوە تاوەکو بچێتە بواری جێبەجێکردنی کردەیی لە سەرجەم فەرمانگە پەیوەندیدارەکاندا.
