گوتەبێژی بەرگریی شارستانیی سۆران بە (كوردستان تیڤی) ڕایگەیاند، سەرلەئێوارەی ئەمڕۆ پێنجشەممە و کەمێک بەر لە ئێستا، لە سنووری شارەدێی سمیلانی سەر بە شارۆچكەی چۆمان، ڕووداوێکی خنکان لە حەوزێکی ئاودا ڕووی دا.
رەوەند هاودیانی گوتەبێژی بەرگریی شارستانیی سۆران رایگەیاند: لە سنووری شارەدێی سمیلانی كوڕ و باوكێك كەوتوونەتە ناو حەوزێكی ئاو و هەردووكیان خنكاون.
راشیگەیاند: ئەو باوكەی گیانی لەدەستداوە ناوی (کاروان عەزیز)ـە، كوڕەكەشی ناوی (ئەیووب کاروان عەزیز)ـە.
رەوەند هاودیانی گوتەبێژی بەرگریی شارستانیی سۆران ئاماژەی بەوەش دا كە لە ئێستادا تیمەکانیان لە شوێنی ڕووداوەکەن و لە ڕێگەی ئۆتۆمبێلی فریاکەوتنەوە، تەرمی هەردوو قوربانییەکە بۆ پزیشکی دادی سۆران دەگوازنەوە.
هەر لەبارەی ڕووداوەكە، شاخەوان حوسێن بەرێوەبەری ناحیەی سمێلان بۆ (کوردستان تیڤی) گوتی: ئەو باوك و كوڕەی لە رووداوەكەدا گیانیان لەدەستداوە، ئاژەڵدارن و لە ناحیەی بجیل لە سنووری ئاکرێ بە مەبەستی ئاژەڵداری روویان لە ناحیەی سمێلان کردووە.
بەرێوەبەری ناحیەی سمێان هەروەها گوتی: باوکەکە تەمەنی 35 ساڵە و کوڕەکەش 13 ساڵانە.
