کۆمپیوتەرێکی زەبەلاحی (Supercomputer) چینی توانی پلەی یەکەمی خێراترین کۆمپیوتەرەکانی جیهان بەدەستبهێنێت، بەمەش کۆتایی بە نزیکەی 10 ساڵ لە باڵادەستیی ئەمریکا هێنا لەم بوارەدا. ئەم دەستکەوتە تیشک دەخاتە سەر هەوڵە چڕەکانی پەکین بۆ گەشەپێدانی توانای تەکنەلۆژیی پێشکەوتوو بە پشتبەستن بە بەرهەمی ناوخۆیی.
لە میانی کۆنفرانسی نێودەوڵەتی "ISC" بۆ کۆمپیوتەرە زەبەلاحەکان کە لە شاری هامبۆرگی ئەڵمانیا بەڕێوەچوو، لیستی نوێی 500 خێراترین کۆمپیوتەری جیهان بڵاوکرایەوە. تێیدا کۆمپیوتەری چینی "Line Shine" (لاين شاين) توانی پلەی یەکەم بگرێت. ئەمە یەکەمجارە لە ساڵی 2017وە کۆمپیوتەرێکی چینی بگاتە لوتکەی ئەم لیستە کە ساڵانە دوو جار بڵاو دەکرێتەوە و وەک پێوەرێکی نافەرمی بۆ هێزی تەکنەلۆژیی وڵاتان دادەنرێت.
کۆمپیوتەری "Line Shine" کە لە شاری شێنزن لە باشووری چین جێگیر کراوە، توانیویەتی خێراییەکی جێگیر بە ئاستی 2.2 "ئێکسا فلۆپ" (Exaflop) تۆمار بکات، کە یەکەیەکی پێوانەیی جیهانییە بۆ ژمارەی ئەو پرۆسە بیرکارییانەی کۆمپیوتەر دەتوانێت لە یەک چرکەدا ئەنجامیان بدات.
خاڵی هەرە گرنگ لەم دەستکەوتەدا ئەوەیە کە ئەم کۆمپیوتەرە بە تەواوی بە پڕۆسێسەری دروستکراوی ناوخۆی چین دیزاین کراوە، نەک پڕۆسێسەرە ئەمریکییەکان کە زۆربەی سیستەمە پێشکەوتووەکانی جیهان بەکاریان دەهێنن. ئەمەش وەک وەڵامێکی تەکنەلۆژیی پەکین دەبینرێت بۆ ئەو گەمارۆ و سنووردارکردنانەی کە واشنتن لە بواری پارچە ئەلیکترۆنییەکاندا خستوویەتیە سەری.
بەم هەنگاوە، کۆمپیوتەری "Line Shine" توانی کۆمپیوتەری "El Capitan"ی سەر بە وەزارەتی وزەی ئەمریکا بۆ پلەی دووەم دابەزێنێت. هەرچەندە ئەمریکا هێشتا سێ پلە لە چوار پلەی یەکەمی لیستەکەی لایە، بەڵام بۆ یەکەمجارە لوتکەی لیستەکەی لەدەست دەدات. لە لایەکی تریشەوە، کۆمپیوتەری "Jupiter Booster"ی ئەڵمانی توانی پلەی پێنجەمی لیستەکە بۆ ئەوروپا مسۆگەر بکات و وەک یەکێک لە پێنج خێراترینەکانی جیهان دەربکەوێت.
