ئەندامێكی لیژنەی دارایی پەرلەمانی عێراق رایگەیاند، حكوومەتی عێراق ئەمڕۆ چوارشەممە بڕیاری دا دەست بە ڕێكارەكانی پلەبەرزكردنەوە و خەرجكردنی دەرماڵەی فەرمانبەرانی هەرێمی كوردستان بكرێت.
دانەر عەبدولغەفار گوتەبێژی فراکسیۆنی پارتی و ئەندامی لیژنەی دارایی لە پەرلەمانی عێراق بە (كوردستان تیڤی)ی ڕایگەیاند: وەزارەتی دارایی عێراق ئەمڕۆ چوارشەممە فەرمانگەی بودجەی راسپارد رێکارەکانی دەستپێکردنەوەی پلەبەرزکردنەوە و خەرجکردنی دەرماڵە بۆ فەرمانبەرانی هەرێمی کوردستان دەست پێ بکات، بە مەبەستی یەکسانکردنی مافەکانیان لەگەڵ فەرمانبەرانی حکوومەتی فیدراڵ.
دانەر عەبدولغەفار ڕاشیگەیاند: بڕیارەکە دوای نووسراوێکی فەرمی دێت بۆ وەزیری دارایی بە ئامانجی نەهێشتنی جیاوازی و بەدیهێنانی دادپەروەری، بەتایبەت دوای ئەوەی فەرمانبەرانی هەرێمی كوردستان چەندین ساڵ لەو شایستانە بێ بەش کرابوون.
كوردستان تیڤی هەروەها زانیویەتی، هەوڵەکان بۆ ئەوەن ساڵانی رابردووی ڕاگیرانی پلەبەرزکردنەوە بۆ فەرمانبەران هەژمار بکرێنەوە و هەروەها تەواوی شایستە داراییە کەڵەکەبووەکانی پەیوەست بەو ماوەیەش بە تەواوی خەرج بکرێن.
