بڕیارە سبەی سێشەممە، 08ـی ئەیلوولی 2026، گەورەترین پێشانگای نێودەوڵەتیی خانووبەرە بە بەشداری سەدان کۆمپانیای ناوخۆیی و بیانی لە شاری هەولێر بکرێتەوە.
د. محەممەد شوکری سەرۆکی دەستەی وەبەرهێنان لەبارەی كردنەوەی پێشانگاكە راگەیاند: زیاتر لە 250 کۆمپانیا لە 16 وڵاتی جیهان بەشداری تێدا دەکەن؛ لەنێویاندا تورکیا، ئێران، ئیمارات، سعوودییە، ئەڵمانیا، چین، ئیتاڵیا، یۆنان، ئیسپانیا و چەندین وڵاتی دیکە هەن، پێشانگاکەش بۆ ماوەی سێ رۆژ بەردەوام دەبێت.
د. محەممەد شوکری گوتیشی: ئامانجی پێشانگاکە نمایشکردنی پڕۆژەکانی نیشتەجێبوونە، هاووڵاتییان دەتوانن راستەوخۆ لەگەڵ کۆمپانیاکان کۆببنەوە و یەکەی نیشتەجێبوون بە شێوازی قۆناخدار یان بە پارەی کاش هەڵبژێرن، هەروەها ئەم پێشانگایە ژینگەیەک بۆ بازرگانان و وەبەرهێنەران دەڕەخسێنێت تاوەکو گرێبەستی هاوبەش ببەستن و سەرمایەی بیانی رابکێشن.
سەرۆکی دەستەی وەبەرهێنان هەروەها گوتی: لە ساڵانی رابردوودا زۆرترین دەرفەتی کار بۆ گەنجان و شارەزایان لە پێشانگاکە ڕاگەیەنراوە، هاووڵاتییان دەتوانن لە کاتی سەردانیکردنی پێشانگاکەدا، پوختەی ژیاننامەیان پێشکەش بە کۆمپانیاکان بکەن بۆ بەدەستهێنانی هەلی کار.
