وەزارەتی ئەوقاف و کاروباری ئایینیی حکوومەتی هەرێمی کوردستان ڕایگەیاند، کە ئامادەکارییەکان بۆ ناردنی ژمارەیەک قوتابی بۆ وڵاتی میسر بە مەبەستی درێژەدان بە خوێندن لە زانکۆی جیهانیی "ئەزهەر" کۆتاییان هاتووە و قوتابیان ئامادەن بۆ گەشتەکەیان.
ڕۆژی پێنجشەممە (6/8/2028)، فارس جەوهەر، بەڕێوەبەری گشتی لە دیوانی وەزارەت و گۆران محەمەد، بەڕێوەبەری نووسینگەی وەزیر، لەگەڵ ئەو قوتابیانە کۆبوونەوە کە بڕیارە لە ئایندەیەکی نزیکدا بەرەو میسر بەڕێ بکەون. لە کۆبوونەوەکەدا، پاڵپشتی و پشتگیریی تەواوی د. پشتیوان سادق، وەزیری ئەوقاف و کاروباری ئایینی بە قوتابیان گەیەندرا و جەخت لە هاوکاریکردنی بەردەوامیان کرایەوە لە ماوەی خوێندنیاندا.
بەرپرسانی وەزارەتی ئەوقاف داوایان لە قوتابیان کرد کە لە وڵاتی میسر بەوپەڕی بەرپرسیارێتییەوە مامەڵە بکەن و وەک نوێنەری شایستەی کلتووری پێکەوەژیانی هەرێمی کوردستان دەربکەون. هەروەها هیوای سەرکەوتنیان بۆ خواستن تاوەکو بتوانن بە پلەی بەرز خوێندنەکەیان لە زانکۆی ئەزهەر تەواو بکەن، کە یەکێکە لە گرنگترین ناوەندە زانستی و ئایینییەکانی جیهانی ئیسلامی.
لەلایەن خۆیانەوە، قوتابیانی بەشداربوو سوپاسی هەڵوێستی وەزیر و وەزارەتی ئەوقافیان کرد بۆ ڕەخساندنی ئەم دەرفەتە زانستییە و دابینکردنی پاڵپشتییە پێویستەکان. چاودێرانی ئایینی پێیان وایە ناردنی قوتابیان بۆ زانکۆ نێودەوڵەتییەکان، دەورێکی باڵا دەبینێت لە گۆڕینەوەی ئەزموونی زانستی و برەودان بە فیکری میانڕەوی لە ناوخۆی هەرێمی کوردستاندا.
زانکۆی ئەزهەر لە قاهیرە، ساڵانە چەندین کورسیی خوێندن بۆ قوتابیانی هەرێمی کوردستان دابین دەکات، ئەمەش لە چوارچێوەی پەیوەندییە کلتووری و ئایینییە دێرینەکانی نێوان هەرێمی کوردستان و وڵاتی میسردا دێت.
