بەڕێوەبەرایەتی هاتوچۆی گەرمیان ڕایگەیاند، بەرەبەیانی ئەمڕۆ پێنجشەممە، بەهۆی ڕووداوێکی هاتوچۆوە لە ناو شاری کەلار، 2 کەس بریندار بوون و یەکێکیان بەهۆی سەختیی برینەکەیەوە ڕەوانەی نەخۆشخانەکانی سلێمانی کراوە.
بەپێی ڕاگەیەندراوی هاتووچۆی گەرمیان، ڕووداوەکە لە جۆری پێکدادان بووە لە نێوان سێ ئۆتۆمبێل لە جۆرەکانی (Toyota Crown، Nissan Sunny و Toyota Yaris) لە نزیک نەخۆشخانەی گشتیی کەلار.
لەبارەی ناسنامە و باری تەندروستی بریندارەکان، هاتووچۆی گەرمیان ئاماژەی بەوە کردووە کە بریندارێکیان مێردمنداڵێکی پیادەیە و لەدایکبووی ساڵی 2010یە، بەهۆی سەختیی برینەکەیەوە دوای گەیاندنی بە نەخۆشخانەی فریاکەوتنی شەهید هەژار، ڕەوانەی سلێمانی کراوە. برینداری دووەمیش سەرنشینی یەکێک لە ئۆتۆمبێلەکان بووە و لەدایکبووی ساڵی 2001ە.
هەر زوو دوای ڕووداوەکە، تیمەکانی هاتوچۆ گەیشتوونەتە شوێنی مەبەست و لێکۆڵینەوەیان دەستپێکردووە، هەروەها هێڵکارییان بۆ ڕووداوەکە ئەنجامداوە بە مەبەستی زانینی هۆکار و چۆنیەتی ڕووداوەکە و دیاریکردنی لایەنی کەمتەرخەم.
