ئەمڕۆ شەممە 5/23، مەسرور بارزانی سەرۆکوەزیرانی هەرێمی کوردستان لەگەڵ فالح ئەلفەییاز، سەرۆکی دەستەی حەشدی شەعبی کۆبووەوە؛ لە دیدارەکەدا کە ئەحمەد ئەلئەسەدی، سەرۆکی بزووتنەوەی سۆمەریون ئامادەی بوو، ئاقارەکانی دۆخی ئەمنی و سیاسیی عێراق و ناوچەکە تاوتوێ کران.
لەم کۆبوونەوەیەدا، مەسرور بارزانی و فالح ئەلفەییاز دوایین گۆڕانکاری و پەرەسەندنە هەستیارەکانی دۆخی گشتیی عێراقیان خستە بەر باس و لێکۆڵینەوە. سەرۆکی حکومەتی هەرێمی کوردستان جەختی لەوە کردەوە کە پاراستنی ئارامیی وڵات پێویستی بە "هاوئاهەنگییەکی تۆکمە" و لێکتێگەیشتنی ڕاستەقینە لە نێوان سەرجەم دامەزراوە ئەمنی و سیاسییەکاندا هەیە، تاوەکو ناوچەکە لە مەترسییەکانی توندوتیژی و نائارامی بپارێزرێت.
تەوەرێکی جەوهەریی گفتوگۆکانی نێوان سەرۆکی حکومەت و سەرۆکی دەستەی حەشدی شەعبی، تایبەت بوو بە "ڕێزگرتن لە دەستوور و سیستەمی فیدراڵی". هەردوولا هاوڕا بوون لەسەر ئەوەی کە جێبەجێکردنی بەندە دەستوورییەکان و پاراستنی مافی هەموو پێکهاتەکان، تاقە گەرەنتییە بۆ "ئارامیی هەمیشەیی" لە عێراق و هەرێمی کوردستاندا. مەسرور بارزانی دووپاتی کردەوە کە سەقامگیریی پایتەختی فیدراڵ و پایتەختی هەرێم تەواکەری یەکترن و دەبێت وەک یەک پاکێجی ئەمنی و سیاسی سەیر بکرێن.
لە بەشێکی دیکەی دیدارەکەدا، جەخت لە پێویستیی یەکخستنی هەوڵەکان کرایەوە بۆ بەرەوڕووبوونەوەی هەر جۆرە هەڕەشەیەک کە زیان بە بەرژەوەندییە باڵاکانی عێراق و هەرێم دەگەیەنێت. ئەم دیدارەی مەسرور بارزانی و فالح ئەلفەییاز وەک ئاماژەیەکی گرنگ دەبینرێت بۆ "دۆزینەوەی زمانێکی هاوبەش" لە نێوان هەولێر و جەمسەرە کاریگەرەکانی بەغدا، تاوەکو ڕێگری لە هەر لادانێک بگرێت کە ببێتە هۆی تێکدانی هاوسەنگییە دەستووری و ئەمنییەکان لە وڵاتدا.
ئەم جووڵە دیپلۆماسییە ئاستبەرزەی مەسرور بارزانی لە بەغدا، نیشانەی ئیرادەیەکی پۆڵایینە بۆ چەسپاندنی "دادپەروەری و سەروەریی یاسا" و داڕشتنەوەی پەیوەندییەکان لەسەر بنەمای بەرژەوەندیی گشتی و هاوبەشیی ڕاستەقینە لە حوکمڕانیدا.
