مەسرور بارزانی، سەرۆکی حکوومەتی هەرێمی کوردستان، پەیامێکی سوپاس و پێزانینی ئاراستەی خەڵکی پارێزگای هەڵەبجە و ناوچەی هەورامان کرد بۆ ئەو هەوڵە بێوچان و کۆششە بێ وێنەیەی لە چەند ڕۆژی ڕابردوودا دایان بۆ دۆزینەوەی تەرمی گەشتیاری جوانەمەرگ "ڕوقییە" کە خەڵکی شاری کەربەلا بوو.
سەرۆکی حکوومەت ئاماژەی بەوە کرد کە ئەم هەڵوێستە نیشانەی کولتووری مرۆڤدۆستی و بەخشندەیی خەڵکی کوردستانە و بە تایبەتی دەستخۆشی لە پارێزگاری هەڵەبجە، هێزە ئەمنییەکان، تیمەکانی بەرگریی شارستانی و هەموو ئەو خۆبەخش و کەسانە کرد کە ڕۆڵیان هەبوو لە دۆزینەوەی تەرمەکەدا.
لە بەشێکی دیکەی پەیامەکەیدا، مەسرور بارزانی پرسە و سەرەخۆشی قووڵی خۆی ئاراستەی بنەماڵە و کەسوکاری خوالێخۆشبوو کرد و هاوخەمیی خۆی بۆ دەربڕین، لە خودای مەزن داواکار بوو گیانی بە بەهەشت شاد بکات و سەبر و ئارامییان پێ ببەخشێت. سەرۆکی حکوومەت نیگەرانیی خۆی لە زۆربوونی ڕووداو و کارەساتە دڵتەزێنەکانی خنکان لەم ماوەیەدا دەربڕی و ڕایگەیاند، کە دەبێت لایەنە پەیوەندیدارەکانی حکوومەت ڕێکار و ڕێنماییە پێویستەکانی سەلامەتی لە شوێنە گەشتیارییەکان، بە تایبەتی لە نزیک ڕووبار، بەنداو و سەرچاوەکانی ئاو توندتر بکەن.
لە کۆتایی پەیامەکەیدا، مەسرور بارزانی داوا و تکای لە هاووڵاتییان و گەشتیاران کرد کە ڕێنماییەکانی سەلامەتی لەبەرچاو بگرن و زیاتر ئاگاداری پاراستنی گیانی خۆیان و کەسوکاریان بن، بەو ئومێدەی خودای مەزن هەموو لایەک لە ڕووداوی نەخوازراو بپارێزێت.
