نێچیرڤان بارزانی سەرۆکی هەرێمی کوردستان لە پۆستێکدا لە هەژماری فەرمی خۆی لە تۆڕی کۆمەڵایەتی (ئێکس) پێشوازی لە بڕیارێكی ئەمریکا کرد بۆ لابردنی ناوی سووریا لە لیستی ئەو دەوڵەتانەی کە پاڵپشتی لە تیرۆر دەکەن.
سەرۆکی هەرێمی کوردستان ئەم هەنگاوەی بە قۆناغێکی گرنگ ناوبرد بۆ پشتگیریکردنی پڕۆسەی بوژانەوە، سەقامگیری و خۆشگوزەرانی لە سووریا، هەروەها بەهێزکردنی پێگەی ئەو وڵاتە بۆ گەڕانەوە بۆ ڕۆڵی سروشتی خۆی لە ناوچەکە و جیهاندا.
نێچیرڤان بارزانی لە پەیامەکەیدا هیوای خواست کە ئەم بڕیارە ببێتە هەوێنێک بۆ بنیاتنانی داهاتوویەکی ئارام کە تێیدا مافی هەموو پێکهاتە جیاوازەکانی سووریا پارێزراو بێت. هەروەها ئاماژەی بەوە کرد کە ئەم گۆڕانکارییە ئاسۆیەکی فراوانتر بۆ پەرەپێدانی پەیوەندییەکانی دیمەشق لەگەڵ عێراق و هەرێمی کوردستان دەکاتەوە و دەبێتە هۆی فراوانکردنی هەماهەنگییەکان لە هەموو بوارەکاندا بە جۆرێک کە خزمەت بە بەرژەوەندییە هاوبەشەکان بکات.
ئەم هەڵوێستەی سەرۆکایەتی هەرێمی كوردستان دوای ئەوە دێت کە ئەمریکا بە فەرمی سووریای لە لیستی وڵاتانی پاڵپشتیکاری تیرۆر دەرهێنا، کە لە ساڵی 1979ـەوە ناوی لەو لیستەدا بوو.
بوونی سووریا لەو لیستەدا بۆ ماوەی پتر لە چوار دەیە، ببووە هۆی سەپاندنی زنجیرەیەک سزای ئابووری و دیپلۆماسی توند کە ڕێگربوون لە گەیشتنی وەبەرهێنانی بیانی و هاوکارییە نێودەوڵەتییەکان بۆ ناوخۆی ئەو وڵاتە.
حکوومەتی هەرێمی کوردستان وەک هاوسێیەكی نزیکی سووریا، سەقامگیریی ئەو وڵاتە بە مەرجێکی سەرەکی دەزانێت بۆ پاراستنی ئاسایشی ناوچەکە و گەشەپێدانی ئاڵوگۆڕی بازرگانی لە ناوچە سنوورییەکاندا.
أرحب بقرار الولايات المتحدة الأمريكية رفع اسم سوريا من قائمة الدول الراعية للإرهاب، وهي خطوة مهمة لدعم تعافي سوريا واستقرارها وازدهارها، وتعزيز عودتها إلى دورها الطبيعي في المنطقة والعالم.
— Nechirvan Barzani (@IKRPresident) August 25, 2026
نأمل أن تسهم هذه الخطوة في بناء مستقبل آمن يحفظ حقوق جميع مكونات سوريا، ويفتح آفاقًا أوسع…
