محەمەد باقر قاليباف سەرۆکی پەرلەمانی ئێران هۆشداری دا کە تەنها هێزی سەربازی ناتوانێت مانەوەی ئێران مسۆگەر بکات ئەگەر خەڵک ڕووبەڕووی برسییەتی ببنەوە و ئابووری وڵات گەشە نەکات.
قاليباف لە میانی کۆبوونەوەیەکدا لەگەڵ بازرگانانی ئێران و عێراق لە باڵیۆزخانەی وڵاتەکەی لە بەغداد ڕایگەیاند: گرنگ نییە چەند هێزی سەربازیمان هەبێت، ئەگەر گەل برسی بێت و سوڕی دارایی، گەشەی ئابووری و بەرهەمهێنانی ناوخۆیمان نەبێت، نامێنینەوە.
سەرۆکی پەرلەمانی ئێران ئاماژەی بەوەش کرد، سەقامگیری ئابووری و ئاسایش لە یەکتری جیاناکرێنەوە و هۆشداری دا کە ئاسایشی سەربازی بەبێ ئابوورییەکی کارا بەردەوام نابێت، گوتیشی: ئاسایش و ئابووری پێویستییان بە یەکتری هەیە، ئەگەر ئاسایش دابین بکەین بەڵام لە ڕێگەی ئابوورییەوە پاڵپشتی نەکەین، نامێنێتەوە.
دەربارەی پرسی جەنگ و دیپلۆماسی، قاليباف جەختی کردەوە کە وڵاتەکەی نە هەوڵی جەنگ دەدات و نە خوازیاریەتی، بەڵام پێویستە سوپا لە ئامادەباشی تەواودا بێت بۆ ئەوەی دیپلۆماسییەت کاریگەر بێت. ڕاشیگەیاند: دیپلۆماسی کاتێک بەهای دەبێت و بەرەو پێش دەچێت کە بۆ جەنگ ئامادە بین، ئەگەر ئامادە نەبین، کەس لە دیپلۆماسیدا وەڵاممان ناداتەوە.
