ڤینسێنت باستۆر، ئەکتەری دێرینی ئەمریکی کە بە بەرجەستەکردنی ڕۆڵی پیاوە مافیاکان و کەسایەتییە بەهێزەکان دەناسرایەوە، لە تەمەنی 80 ساڵیدا کۆچی دوایی کرد. باستۆر ناوبانگێکی جیهانی هەبوو، بەتایبەتی بەهۆی دەورگێڕانی کەسایەتی سلفاتۆری بونبنسێرۆ کە بە (Big Pussy) ناسرابوو لە زنجیرە درامای بەناوبانگی ((The Sopranos .
بۆب مکگوان، بەڕێوەبەری کارەکانی باستۆر بە ئاژانسی ئەسۆشێتد پرێس (AP)ـی ڕاگەیاند، کە تەرمی ئەکتەرەکە لە ماڵەکەی خۆیدا لە سیتی ئایلاند لە نیویۆرک دۆزراوەتەوە، دوای ئەوەی بۆ ماوەی چەند ڕۆژێک بێسەروشوێن بووە و هیچ هەواڵێکی نەبووە.
ڤینسێنت باستۆر لە هەشتاکانی سەدەی ڕابردووەوە دەستی بە کارە هونەرییەکانی کردووە و لە چەندین فیلمی گەورە و مێژووییدا بەشداری کردووە، لە دیارترینیان فیلمی (Goodfellas) و (Awakenings) لە ساڵی 1990.
