ئەمڕۆ شەممە 7ـی تشرینی دووەمی 2026، بەرنامەی "پاداشت لە پێناو دادپەروەری" سەر بە وەزارەتی دەرەوەی ئەمەریکا لە ڕاگەیەندراوێکدا بڵاوی کردەوە: پاداشتێکی دارایی کە دەگاتە 20 ملیۆن دۆلار، لەگەڵ دەرفەتی نیشتەجێکردنەوە (پەنابەری) لە وڵاتێکی دیکە دابین دەکرێت، لە بەرامبەر دەستکەوتنی زانیاریی هەواڵگریی ورد لەسەر بەرنامە ئەتۆمییەکەی ئێران.
لە ڕاگەیەندراوەکەدا هاتووە، ئەم پاداشتە سەرجەم ئەو داتایانە دەگرێتەوە کە پەیوەندییان بە دامەزراوەکان، کەلوپەل و ئامێرە پسپۆڕییەکان، جموجۆڵەکان، کادیرانی مرۆیی و ئەو ناوەندە زانستییانەوە هەیە کە بەشداری لە چالاکییە ئەتۆمییەکاندا دەکەن.
ئەم ڕاگەیاندنەی ئەمەریکا دوای ڕاپۆرتێکی ئاژانسی نێودەوڵەتیی وزەی ئەتۆم (IAEA) بۆ ساڵی 2025 دێت، کە تێیدا پشتڕاستی کردبووەوە ئێران چالاکیی پیتاندنی یۆرانیۆمی بۆ ئاستی پاکیی 60% بەرز کردووەتەوە، ئەمەش بە پێوەرێکی تەکنیکیی زۆر مەترسیدار دادەنرێت کە وڵاتەکە تەنیا یەک هەنگاو لە ئاستی 90% دوور دەخاتەوە کە پێویستە بۆ بەرهەمهێنانی چەکی ئەتۆمی.
ئەمەریکا ئاماژە بەوە دەکات کە ئێران لەنێو ئەو دەوڵەتانەی چەکی ئەتۆمییان نییە بە تەنیا گەیشتووەتە ئەم ئاستە بەرزەی پیتاندن، لە نێوەندی هۆشداریی پسپۆڕانی نێودەوڵەتیدا لەسەر ئەگەری بەرهەمهێنانی بڕی پێویست بۆ دروستکردنی چەندین بۆمبی ئەتۆمی لە ئەگەری بەردەوامبوونی پرۆسەی پیتاندنی زیاتر.
لە کۆتایی بەیاننامەکەی ئەمەریکادا هاتووە، ئاژانسی نێودەوڵەتیی وزەی ئەتۆم هۆشداریی داوە لە لێکەوتەکانی "پابەندنەبوونی ڕژێمی ئێران بە بەڵێنەکانی گەرەنتی و چاودێری"، کە ئەمەش بووەتە هۆی لاوازبوونی توانای ئاژانسەکە و لەدەستدانی بنەمای "بەردەوامیی زانین" لە چاودێریکردن و بەدواداچوونی کۆگاکانی ئامێرەکانی سەنتەرفیوژ و پێکهاتە سەرەکییەکانی بەرنامە ئەتۆمییەکەی ئێران.
