ئاژانسی "ڕۆیتەرز" لە زاری سەرچاوە ئاگادارەکان ڕاگەیاند، سکۆت بێسێنت، وەزیری گەنجینەی ئەمەریکا لەم دواییانەدا لە ماڵەکەی خۆی لە واشنتۆنی پایتەختەوە گواستراوەتەوە بۆ بنکەیەکی سەربازی، ئەوەش پاش ئەوەی هەڕەشەی ئێرانی بۆ سەر ژیانی پێگەیشتبوو، ئەم هەواڵەش سەرەتا لەلایەن ڕۆژنامەی "نیویۆرک تایمز"ـەوە ئاشکرا کرا، هاوکات کۆتایی مانگی ڕابردووش بەرپرسێکی باڵای هەواڵگری لە ئیدارەی دۆناڵد ترەمپ هۆشداری دابوو کە پیلانەکانی ئێران بۆ بەئامانجگرتنی ئەمەریکییەکان گەیشتووەتە قۆناغێکی پێشکەوتوو.
بەپێی ڕاپۆرتەکە، سکۆت بێسێنت لە مانگی ئابەوە سەرپەرشتیی هەڵمەتێکی سزای قورس و گوشاری ئابووریی واشنتۆن بۆ سەر تاران دەکات کە بە "پرۆسەی پەراوێزخستنی ئابووری" ناسراوە، بە مەبەستی ناچارکردنی ئێران بۆ وەستاندنی هێرشەکانی سەر کەشتییەکان و کردنەوەی گەرووی هورمز، کە لە دوای هێرشی ئەمەریکا و ئیسرائیل بۆ سەر ئێران لە 28ـی شوباتی ڕابردووەوە بە نیمچەداخراوی ماوەتەوە، ئەم هەڵمەتەی گوشاری ئابوورییش کە هاوکاتە لەگەڵ گەمارۆی دەریایی ئەمەریکا بۆ سەر بەندەرەکانی ئێران، سەپاندنی سزای بەسەر لقەکانی ئەو بانکانەی ڕۆژهەڵاتی ناوەڕاست و کۆمپانیاکانی خزمەتگوزارییە داراییەکاندا گرتووەتەوە کە ئاسانکاری بۆ مامەڵە دارایییەکانی ئێران دەکەن.
لەم بارەیەوە، گوتەبێژی وەزارەتی گەنجینەی ئەمەریکا لە ڕاگەیەندراوێکدا دووپاتی کردەوە کە ئێران ناتوانێت وەزیرەکەیان سارد بکاتەوە، کە هێشتا پابەندە بە جێبەجێکردنی پرۆسەی پەراوێزخستنی ئابووری و بەردەوامیدان بە گەمارۆکە، کە هەردووکیان پێکەوە دەبنە هۆی داڕمانی ئابووریی ئێران. سەرەڕای ئەمەش ڕۆژنامەی نیویۆرک تایمز ئاماژەی بەوە کردووە کە تاوەکو ئێستا ئاستی مەترسیداریی ئەو هەڕەشانە ڕوون نییە کە ئاراستەی بێسێنت کراون.
سەرچاوەیەکی ئاگادار ڕوونیکردەوە کە نیگەرانییە ئەمنییەکانی دەوروبەری وەزیری گەنجینە کاتێک زیاتر بوون کە ڕۆژنامەی "وۆڵ ستریت جۆرناڵ" وێنەیەکی ئاسمانیی ئەو کۆشکەی بڵاو کردەوە کە بێسێنت بە (12.5) ملیۆن دۆلار لە ناوچەی "جۆرج تاون" کڕیبووی، کەمێک دوای پەسەندکردنی وەک وەزیری گەنجینە لە کانوونی دووەمی ساڵی 2025، سەرچاوەکە دەڵێت ئەو وێنەیە بووەتە هۆی ئاشکرابوونی شوێنی جوگرافیی ماڵەکەی و هەر لەبەر ئەوەش لە پێناو سەلامەتیی گیانیدا گواستراوەتەوە بۆ بنکەیەکی سەربازی.
لە کۆتایی ڕاپۆرتەکەدا هاتووە کە پێشتریش ئێران پلاندانانی بۆ هێرشکردنە سەر بەرپرسان و کەسایەتییەکان لە ناو خاکی ئەمەریکا ڕەتکردبووەوە و بەرپرسانی ئەمەریکیش ئاماژە بەوە دەکەن کە توانای ئێران بۆ ئەنجامدانی هێرشی بەرفراوان لە ناوخۆی ئەمەریکا و ناوچەکانی دیکەی دەرەوە سنووردارە، شایەنی باسە هێرشەکانی ئەمەریکا و ئیسرائیل بۆ سەر ئێران و هێرشەکانی ئیسرائیل بۆ سەر لوبنان لە کاتی جەنگدا، بوونەتە هۆی کوژرانی هەزاران کەس و ئاوارەبوونی ملیۆنان کەسی دیکە، هاوکات کوژرانی بەرپرسانی باڵای ئێرانیشی لێکەوتووەتەوە کە یەکێک لەوانە عەلی خامنەیی، ڕێبەری باڵای پێشووی ئێران بووە.
