ئەم هۆشدارییە لە چوارچێوەی زنجیرەیەک ئاگاداریی ئەمنیدا هاتووە کە باڵیۆزخانە و نێردە دیپلۆماسییەکانی ئەمەریکا لە چەندین وڵاتی ئەورووپی لە ڕۆژی سێشەممە، 17ی تشرینی دووەم بڵاویان کردووەتەوە، تێیدا داوایان لە هاووڵاتییانی ئەمەریکی کردووە وریاییی خۆیان بەرز بکەنەوە، بەتایبەت لە شوێنە قەرەباڵغەکان و بۆنە گشتییەکاندا.
لە ئاگادارییە ئەمنییەکاندا هۆشداری دراوە لەوەی کۆبوونەوە گەورەکان و ئاهەنگە جەماوەرییەکان لەوانەیە ببنە ئامانجی گرووپە تیرۆریستییەکان و تاوانباران، هاوکات ئاماژە بەوەش کراوە کە ئەنجامدەرانی هێرشەکان، بەوانەشەوە کە بە شێوەی تاکەکەسی دەجووڵێنەوە، لەوانەیە بەبێ هیچ ئاگادارکردنەوەیەکی پێشوەختە پەلامارەکانیان ئەنجام بدەن.
باڵیۆزخانەکانی ئەمەریکا بازاڕەکان، سەنتەرە بازرگانییەکان، وێستگە سەرەکییەکانی گواستنەوە، شوێنە گەشتیارییەکان و پەرستگاکانیان وەک شوێنە هەستیارەکان دەستنیشان کردووە، بەڵام جەختیان کردووەتەوە کە زانیارییەکی هەواڵگریی دیاریکراو لەبارەی هەڕەشەیەکی دەستبەجێ لەبەردەستدا نییە.
ئەم هۆشدارییە هەریەک لە وڵاتانی بەریتانیا، ئەڵمانیا، ئیسپانیا، پورتوگال، بولگاریا، ئێرلەندا، سلۆڤینیا و چەند وڵاتێکی دیکەی ئەورووپای گرتووەتەوە. هاوکات باڵیۆزخانەی ئەمەریکا لە لەندەن داوای لە هاووڵاتییانی کردووە خۆیان لە ڕاکێشانی سەرنج لە شوێنە گشتییەکان بەدوور بگرن، بە هێمنی بمێننەوە و پابەندی تەواوی ڕێنمایییەکانی پۆلیس و هێزە ئەمنییەکان بن







