ئاندی بێرنهام، سەرۆک وەزیرانی بەریتانیا، پلانێکی بەرفراوانی بۆ گەشەپێدانی خزمەتگوزارییەکانی تەندروستیی دەروونی لە چوارچێوەی سیستەمی تەندروستیی نیشتمانی (NHS) ڕاگەیاند، بە ئامانجی دابینکردنی هاوکاریی خێرا و گەیشتن بە نەخۆشەکان پێش ئەوەی بگەنە قۆناغی قەیرانی سەخت.
بێرنهام ئاماژەی بەوە کرد کە خزمەتگوزارییەکانی تەندروستیی دەروونی لە ساڵانی ڕابردوودا نەیانتوانیوە لەگەڵ زیادبوونی داواکارییەکاندا هەنگاو بنێن، ئەمەش وای کردووە زۆربەی نەخۆشەکان ناچار بن بۆ ماوەیەکی زۆر چاوەڕێ بکەن یان تەنها کاتێک هاوکاری بکرێن کە دەگەنە حاڵەتی مەترسیدار. سەرۆک وەزیران جەختی کردەوە کە "ئەم بارودۆخە پێویستە بگۆڕێت" تاوەکو فشارەکان لەسەر خێزانەکان و نەخۆشخانەکان کەم ببنەوە.
بەپێی پلانە نوێیەکە، حکوومەتی بەریتانیا 100 سەنتەری نوێی تەندروستیی دەروونی لە ناو کۆمەڵگاکاندا دروست دەکات. تایبەتمەندیی ئەم سەنتەرانە لەوەدایە کە ئەو کەسانەی پێویستییان بە هاوکاریی هەیە، دەتوانن بەبێ وەرگرتنی "تەحویل" (Referral) ڕاستەوخۆ سەردانیان بکەن و چیتر چەندین مانگ چاوەڕێی وەرگرتنی پشتگیری نەکەن. جگە لەمە، 59 بەشی فریاکەوتنی تایبەت بە تەندروستیی دەروونی دادەمەزرێنرێن تاوەکو لە هەمان ڕۆژدا چارەسەری پسپۆڕ پێشکەش بەو کەسانە بکەن کە لە بارودۆخێکی کتوپڕدان.
بێرنهام ڕوونی کردەوە کە ئەم پڕۆژەیە سوود لەو ئەزموونە سەرکەوتووە وەردەگرێت کە پێشتر لە ناوچەی "مانچێستەری گەورە" جێبەجێ کراوە. لەم سیستمە نوێیەدا، پسپۆڕانی تەندروستیی دەروونی لەگەڵ پزیشکانی گشتی، شارەوانییەکان و ڕێکخراوە خێرخوازییەکان هەماهەنگی دەکەن، تاوەکو هاوکارییەکە تەنها دەرمان نەبێت، بەڵکو یارمەتیی نەخۆشەکان بدەن لە دۆزینەوەی هەلی کار و چارەسەرکردنی کێشەی نیشتەجێبوونیشیان.
سەرۆک وەزیرانی بەریتانیا تیشکی خستە سەر "قەیرانی قووڵی دەروونی" لە ناو نەوەی نوێدا. ئەو ئاماژەی بەوە کرد کە نزیکەی 1 ملیۆن گەنج لە وڵاتدا نە خەریکی خوێندنن و نە خاوەن کارن، و زۆربەیان بەهۆی تێکچوونی باری دەروونییەوە ئەو دەرفەتانەیان لەدەستداوە. بێرنهام وتی: "داهاتووی وڵاتەکەمان بەندە بە گەنجانەوە، بۆیە حکوومەت پشتگیریی تەواویان دەکات تاوەکو ژیانیان بگەڕێتەوە سەر ڕێڕەوی ئاسایی."
لە کۆتایی پەیامەکەیدا، ئاندی بێرنهام داوای لەو کەسانە کرد کە ئێستا بەدەست کێشەی دەروونییەوە دەناڵێنن، نائومێد نەبن و دڵنیای دان کە هاوکارییەکان لە ڕێگەدان. ئەو وتی: "لە یەکەم ڕۆژی دەستبەکاربوونمەوە بەڵێنم دا کە وەبەرهێنان لە سەرکەوتندا بکەم نەک پارەدان بۆ شکست، ئەم پلانە نوێیەش جێبەجێکردنی ئەو بەڵێنەیە."
