وەزارەتی دەرەوەی ئایسلەندا، ئەمڕۆ سێشەممە ڕایگەیاند کە باڵیۆزی ئەمریکایان لە وڵاتەکەیان بانگهێشت کردووە، ئەوەش وەک ناڕەزایەتییەک بەرامبەر بڵاوکردنەوەی نەخشەیەک لەلایەن دۆناڵد ترەمپەوە کە تێیدا ئایسلەندا وەک بەشێک لە خاکی ئەمریکا نیشان دراوە.
وەزارەتی دەرەوەی ئایسلەندا لە بەیاننامەیەکدا ئاماژەی بەوە کردووە، سۆرگێردور کاترین گۆنارسدۆتیر، وەزیری دەرەوەی وڵاتەکە، ڕۆژی ڕابردوو باڵیۆزی ئەمریکای بانگهێشت کردووە بۆ ئەوەی پەیامێکی ڕوون و توندی پێ ڕابگەیەنێت، کە تێیدا جەخت کراوەتەوە بڵاوکردنەوەی ئەو جۆرە وێنانە "بە هیچ شێوەیەک کارێکی گونجاو نییە.
ڕۆژی دووشەممە، دۆناڵد ترەمپ لە ڕێگەی پلاتفۆرمەکانی تۆڕە کۆمەڵایەتییەکانەوە وێنەی نەخشەیەکی بڵاوکردەوە کە تێیدا وڵاتانی کەنەدا، مەکسیک، ئایسلەندا و دوورگەی گرینلاند بە ڕەنگ و نیشانەکانی ئاڵای ئەمریکا داپۆشرابوون، ئەمەش وەک ئاماژەیەک بۆ ئەوەی ئەو ناوچانە بەشێکن لە ئەمریکا.
ئەم هەنگاوەی ترەمپ لە کاتێکدایە کە لە ڕۆژانی ڕابردووشدا چەندین پێشنیاری هاوشێوەی بۆ گۆڕینی ناوی ویلایەتەکان و ناوچە سنوورییەکان کردبوو، کە کاردانەوەی جیاوازی نێودەوڵەتیی لێکەوتووەتەوە.
