وەزیرانی دارایی گرووپی 20 کۆبوونەوەیەکیان دەستپێکرد کە تا ڕۆژی سێشەممە بەردەوام دەبێت لە ئەمریکا، لە کاتێکدا دۆناڵد ترەمپ سەرۆکی ئەمریکا باجی قورسی بەسەر چەند وڵاتێکی ئەندامدا سەپاندووە و هەوڵدەدات پشتیوانی زیاتر بۆ شەڕی ئابووریی دژی ئێران کۆبکاتەوە.
کۆبوونەوەی گرووپی 20، یەکەمین كۆبوونه‌وه‌ی لوتكه‌ی ئابوورییه کە لەلایەن ئەمریکاوە میوانداری دەکرێت لە دامێنی چیای ئەپالاچیان لە شاری ئەشڤیل لە ویلایەتی کارۆلینای باکوور .
لای خۆیه‌وه، سکۆت بیسێنت وەزیری گەنجینەی ئەمریکا کە خەڵکی ویلایەتی کارۆلینای باشووری دراوسێی ئەمریکایە، بڕیارە شانبەشانی کیڤن وارش سەرۆکی یەدەگی فیدراڵی ئه‌مه‌ریكا سەرکردایەتی لوتكه‌ی كۆبوونه‌كه بکات.
واشنتۆن کە ئەمساڵ پۆستی سەرۆکایەتی گرووپی 20 له‌ئه‌ستۆیه کە گەورەترین گرووپی ئابووری جیهانە كه چین، هیندستان، ژاپۆن و فەرەنسا و چه‌ندین وڵاتی تر تیایدا به‌شدارن.
بڕیاره له دیداره تایبه‌ته‌كانی لوتكه‌كه‌دا گفتوگۆکان لەسەر ڕێگاکانی بەرزکردنەوەی گەشەکردن و کەمکردنەوەی سنووردارکردنی ڕێکخراوەیی و چارەسەرکردنی "ناهاوسەنگی" لە بازرگانیدا چڕ بکرێته‌وه.
پێشبینی دەکرێت پرسگەلێکی تر خۆیان بسەپێنن، لانیکەم لە پشت پەردەوە، دیارترینیان شەڕی ڕۆژهەڵاتی ناوەڕاستە کە شەش مانگ لەمەوبەر لە دوای هێرشی ئەمریکا بۆ سەر ئێران سەریهەڵدا، کە بووە هۆی قەیرانی وزە و بەرزبوونەوەی نرخەکان لە سەرانسەری جیهاندا.
بێسنت، وه‌زیری گه‌نجینه‌ی ئه‌مریكا ئەرکی سەرکردایەتیکردنی شەڕی ئابووری لە دژی ئێران لەسەر بنەمای گەمارۆکان پێسپێردراوه، دوای ئەوەی واشنتۆن نەیتوانی کۆماری ئیسلامی لە ڕووی سەربازییەوە له‌ناو ببات.
وەزیری خەزێنەی ئەمەریکا لەم دواییانەدا هۆشداری دایە ئەو وڵاتانەی کە بەردەوامن لە بازرگانی لەگەڵ ئێران و هەڕەشەی ئەوەی کرد کە دەستڕاگەیشتنیان بە سیستەمی دارایی سنووردار ده‌كات.
