وەزارەتی دەرەوەی ئەمریکا ڕایگەیاند، ئیدارەی ترەمپ دەستی کردووە بە جێبەجێکردنی ڕێکاری توند بەرامبەر بەو هاووڵاتییە بیانییانەی لەناو خاکی ئەمریکادا یاساکان پێشێل دەکەن، بەتایبەتی ئەوانەی بە شێوەیەکی مەترسیدار شۆفێری دەکەن.
بەپێی ڕاگەیەندراوێکی فەرمیی وەزارەتی دەرەوە، ئەم بڕیارە هەڵوەشاندنەوەی دەستبەجێی ڤیزە و قەدەغەکردنی گەشتکردن بۆ ئەمریکا دەگرێتەوە بۆ ئەو کەسانەی کە بەهۆی خواردنەوەی کحول، بەکارهێنانی ماددەی هۆشبەر، یان بێباکی لە شۆفێریکردن، گیانی هاووڵاتییانی ئەمریکی دەخەنە مەترسییەوە. وەزارەت جەختی کردەوە کە ئامانج لەم هەنگاوە پاراستنی شەقامەکانی ئەمریکایە لە شۆفێرە سەرپێچیکارە بیانییەکان.
وەزارەتی دەرەوە چەندین حاڵەتی دیاریکراوی خستەڕوو کە تێیدا ڤیزەی کەسەکان هەڵوەشێنراوەتەوە، لەوانە:-
دەستگیرکردنی هاووڵاتییەکی بیانی بەهۆی شۆفێریکردن لە کاتی سەرخۆشیدا (DUI) و ئەنجامدانی تووندوتیژیی خێزانی.
حاڵەتێکی دیکە کە تێیدا شۆفێرێک بە ئاستێکی بەرزی کحول لە خوێنیدا و لە کاتێکدا منداڵێکی لە ناو ئۆتۆمبێلەکەدا بووە، دەستگیر کراوە.
شۆفێرێک کە بڕی 3 هێندەی ڕێژەی ڕێگەپێدراو کحولی خواردووەتەوە و تەنانەت لە کاتی ئامادەبوونی لە دادگاشدا هەر بە سەرخۆشی دەرکەوتووە.
کەسێکی دیکە کە لە کاتی شۆفێریکردندا ماددەی هۆشبەری (هێرۆین)ی پێ بووە.
لە ڕاگەیەندراوەکەدا هاتووە کە "هیچ دەرفەتێکی دووەم" نادرێتە ئەو گەشتیار و بیانییانەی کە بێڕێزی بە یاساکانی ئەمریکا دەکەن. وەزارەتی دەرەوە ئاماژەی بەوە کرد کە لە سایەی سەرۆکایەتیی دۆناڵد ترەمپدا، پاراستنی سەلامەتیی هاوڵاتیانی ئەمریکی لە پێشینەی هەموو کارەکانە و هەر بیانییەک ببێتە هەڕەشە بۆ سەر کۆمەڵگە، مافی مانەوەی لە و وڵاتەدا لێ دەسەندرێتەوە.
چاودێرانی یاسایی دەڵێن ئەم هەنگاوە نیشانەی توندتربوونی سیاسەتەکانی کۆچ و کۆنتڕۆڵکردنی سنوورەکانە لە لایەن ئیدارەی نوێی واشنتۆنەوە، کە تێیدا تەنانەت سەرپێچییەکانی هاتوچۆش دەبنە هۆی دەرکردنی هاوڵاتیانی بیانی لە وڵاتەکەدا.
