ئیمانوێل ماکرۆن لە دوایین نمایشی سەربازیی خۆیدا وەک سەرۆکی فەڕەنسا، پەیامێکی بەهێزی لەبارەی ئامادەیی ئەوروپا بۆ بەرگری و پاڵپشتیکردنی ئۆکرانیا ئاراستەی مۆسکۆ و واشنتن کرد.
شەقامی شانزەلیزێ لە ناو جەرگەی پاریس بووە مەیدانی گەورەترین نمایشی سەربازیی سەردەمی سەرۆکایەتیی ئیمانوێل ماکرۆن، کە تێیدا زیاتر لە 50,000 بینەر لە ژێر تیشکی خۆرێکی گەشدا و بە ڕێکاری ئەمنیی توند، چاودێریی هێز و توانای سەربازیی فەڕەنسا و هاوپەیمانەکانیان کرد. ئەم نمایشە کە بە بۆنەی ڕۆژی نیشتمانیی فەڕەنساوە ڕێکخرابوو، سیما و ڕەهەندێکی نێودەوڵەتیی جیاوازی هەبوو، چونکە هێزەکانی 35 وڵاتی جیاواز کە بە "هاوپەیمانیی خوازیاران" ناسراون و پاڵپشتی لە کیێڤ دەکەن، بەشدارییان تێدا کرد. ئامادەبوونی 25 سەرۆک و سەرۆکوەزیرانی وڵاتان، لە پێش هەموویانەوە ڤۆلۆدیمیر زیلینسکی سەرۆکی ئۆکرانیا، وایکرد نمایشەکە لە مەراسیمێکی نیشتمانییەوە بگۆڕێت بۆ نیشاندانی یەکڕیزیی ستراتیژیی ئەوروپا بەرامبەر بە هەڕەشەکانی ڕووسیا.
لە نمایشەکەدا کە بە یەکێک لە گەورەترین حەشدە سەربازییەکانی مێژووی نوێی فەڕەنسا دادەنرێت، نزیكەی 6,700 سەربازی پیادە، 98 فڕۆکەی جەنگی، 31 هێلیکۆپتەر و 315 زرێپۆش و ئۆتۆمبێلی سەربازی بەشدارییان کرد. یەکێک لە سەرنجڕاکێشترین دیمەنەکانی مەراسیمەکە، تێپەڕبوونی گروپێکی 25 کەسی لە سەربازانی ئۆکرانی بوو بە جلوبەرگی سەربازیی خۆیانەوە، کە لەلایەن ئامادەبووان و سەرکردەکانەوە بە چەپڵەڕێزانێکی گەرم پێشوازییان لێکرا. ماکرۆن لە پەیامێکدا ئاماژەی بەوە کرد کە ئامادەبوونی ئەم سەربازانە هێمایەکە بۆ "ئازایەتی و چارەنووسی هاوبەشی" نێوان فەڕەنسا و ئۆکرانیا، و نیشانەی ئەوەیە کە پاریس تا کۆتایی لە پاڵ کیێڤدا دەمێنێتەوە.
ئەم نمایشە سەربازییە لە کاتێکی هەستیاردا دێت کە ئەوروپا هەست بە مەترسییەکی جدی دەکات لە لایەک بەهۆی هێرشە بەردەوامەکانی ڕووسیا و لە لایەکی تریش بەهۆی نادیاریی هەڵوێستەکانی ئەمریکا لە سەردەمی دۆناڵد ترەمپ. جەنەراڵ فابیان ماندۆن، سەرۆک ئەرکانی سوپای فەڕەنسا، ڕایگەیاند کە نمایشەکە بەرجەستەکردنی ڕاستەقینەی "هاوسۆزیی ستراتیژیی" نێوان دەوڵەتە هاوپەیمانەکانە. فەڕەنسا دەیەوێت بە جیهان بڵێت کە ئەوروپا خاوەنی سوپایەکی ئامادەیە بۆ شەڕ و چیتر تەنها پشت بە پاڵپشتیی دەرەکی نابەستێت، ئەمەش دوای ئەوەی ماکرۆن لە ماوەی دەسەڵاتی خۆیدا توانی بودجەی بەرگریی حکوومەت دوو هێندە زیاد بکات و پرۆسەیەکی فراوانی "دووبارە پڕچەککردنەوە" دەست پێ بکات.
لە ئاسمانی پاریسدا، فڕۆکە جەنگییەکانی جۆری "میراج 2000" نمایشێکی سەرنجڕاکێشیان ئەنجام دا، کە تێیدا بۆ یەکەمجار یاریدەدەری فڕۆکەوانە ئۆکرانییەکان کە لە فەڕەنسا مەشقیان کردبوو، بەشدار بوون. فڕۆکەکان بە بارستاییەکی زۆری چەک و تەقەمەنییەوە فڕین، لەوانە مووشەکی کرۆزی "سکاڵپ"، وەک پەیامێکی ڕاشکاو بۆ مۆسکۆ کە فەڕەنسا توانای وەشاندنی گورزی توندی هەیە. جەنەراڵ لۆیک میزۆن، سەرپەرشتیاری نمایشەکە، جەختی کردەوە کە دەیانەوێت بە هاووڵاتییانی خۆیان و جیهان بسەلمێنن کە ئەو پارە زۆرەی حکوومەت لە کەرتی بەرگریدا خەرجی کردووە، بووەتە هۆی زیادبوونی ژمارەی سەربازان و دابینکردنی پێشکەوتووترین تەکنەلۆژیای جەنگی بۆ پاراستنی ئاسایشی نیشتمانی و ئەوروپی.
سەرەڕای شکۆداریی نمایشەکە، ڕاپۆرتەکان ئاماژە بە دابەشبوونی ڕای گشتیی فەڕەنسی دەکەن سەبارەت بە تێچوو و ئاراستەی سیاسیی مەراسیمەکە. ئەگەرچی 80%ی هاووڵاتییان سەیری نمایشەکە وەک هێمایەکی شوناسی نیشتمانی دەکەن، بەڵام 42%یان نیگەرانن لەوەی فەڕەنسا زیاتر لە پێویست جەخت لەسەر دۆسیەی ئۆکرانیا و هاوکارییە ئەوروپییەکان دەکاتەوە. ئەم ناڕەزایەتییە لە کاتێکدایە کە وڵاتانی "هاوپەیمانیی خوازیاران" لە کۆبوونەوەیەکدا لە پاریس ڕێککەوتوون لەسەر ناردنی هێزی سەربازی بۆ ئۆکرانیا لە ئەگەری پێویستبوون لە دوای هەر ئاگربەستێک، ئەمەش وەک هەنگاوێک بۆ گەرەنتیکردنی ئاشتییەکی درێژخایەن لە کیشوەرەکەدا کە چیتر نەکەوێتە ژێر هەڕەشەی ڕاستەوخۆی مۆسکۆوە.
