لە ئەنجامی هێرشی چەند درۆنێکی ڕووسی بۆ سەر ناوەندێکی بازرگانی لە شاری کریڤی ڕیه، کە زێدی ڤلۆدیمیر زێلێنسکی، سەرۆک کۆماری ئۆکراینا، لانی کەم 16 کەس کوژران و زیاتر لە 130 کەسی دیکەش بریندار بوون.
زێلێنسکی لە پەیامێکی تونددا ئەم هێرشەی بە کارێکی "وەحشیانە" وەسف کرد و بەڵێنی دا کە وڵاتەکەی وەڵامی ئەم هەنگاوەی مۆسکۆ دەداتەوە.
ئەم هێرشە درۆنییە ناوەندێکی بازرگانیی قەرەباڵغی کردووەتە ئامانج، کە بووەتە هۆی دروستبوونی وێرانکارییەکی گەورە و سووتانی بەشێکی باڵەخانەکە. تیمەکانی فریاگوزاری و بەرگریی شارستانی دەستبەجێ گەیشتوونەتە شوێنی ڕووداوەکە بۆ ڕزگارکردنی ئەو کەسانەی لەژێر داروپەردووەکاندا گیریان خواردووە، و بەرپرسانی تەندروستییش ئاماژە بەوە دەکەن کە بەهۆی سەختیی برینی هەندێک لە بریندارەکانەوە، ئەگەری بەرزبوونەوەی ژمارەی قوربانییەکان هەیە.
هێرشکردنە سەر ناوچە نیشتەجێبوونەکان و ناوەندە مەدەنییەکان لە ئۆکرانیا لەلایەن سوپای ڕووسیاوە، ماوەی زیاتر لە دوو ساڵە بەردەوامە و بووەتە هۆی کارەساتێکی مرۆیی گەورە لە ناوچە جیاوازەکانی ئەو وڵاتەدا. لە کاتێکدا مۆسکۆ بەردەوام ئیدیعای ئەوە دەکات کە تەنیا ئامانجە سەربازییەکان دەپێکێت، بەڵام نەتەوە یەکگرتووەکان و ڕێکخراوە مرۆییەکان ڕووسیا بە پێشێلکردنی یاسا نێودەوڵەتییەکان و بەئامانجگرتنی ڕاستەوخۆی خەڵکی مەدەنی تۆمەتبار دەکەن، ئەمەش وایکردووە فشارە نێودەوڵەتییەکان بۆ سەر کرێملین زیاتر بن.
