ئەمڕۆ پێنجشەممە چەند بەشێكی باڵەخانەی وەزارەتی جەنگی ئەمریكا (پێنتاگۆن) داخرا، بەهۆی ئەوەی لەنێو باڵەخانەكەدا هەست بە بۆنێكی سەیر و ماددەیەكی مەترسیدار كراوە.
شۆن بارنێل گوتەبێژی پێنتاگۆن ڕایگەیاندووە کە بەهۆی هەستكردن بە ماددەی مەترسیدار و کێشەیەک لە کوالێتی هەوای نێو باڵەخانەی پێنتگانۆ، بڕیاری داخستن و کەرەنتینەکردن لە چەند بەشێکی بارەگای وەزارەتەکەدا كراوە.
گوتەبێژی پێنتاگۆن هەروەها رایگەیاندووە كە فەرمان بەو كارمەندانە كراوە كە ئێستا لەنێو باڵەخانەی پێنتاگۆنن، لە شوێنەكانی خۆیان بمێننەوە و نەیەنە دەرەوە.
لەلایەکی دیکەوە تیمەكانی ئاگرکوژێنەوە ڕەوانەی نێو باڵەخانەی وەزارەتی بەرگریی ئەمریكا کراون و لە ئێستادا خەریکی بەدواداچوون و كۆنتڕۆڵكردنی بارودۆخەكەن.
لای خۆیانەوە بەرپرسانی پێنتگۆن تا ئێستا هیچ زانیارییەكی دروستیان لەبارەی سەرچاوەی ئەو بۆن و ماددە مەترسیدارە بڵاو نەكردۆتەوە.
