جۆ بایدن، سه‌رۆکی پێشووی ئه‌مریکا، ڕایگه‌یاند که به‌م زووانه کتێبی یاده‌وه‌رییه‌کانی سه‌رده‌می سه‌رۆکایه‌تییه‌که‌ی بڵاو ده‌کاته‌وه، هاوکات دڵنیایی دا که پڕۆسه‌ی چاره‌سه‌رکردنی بۆ نه‌خۆشیی شێرپه‌نجه به شێوه‌یه‌کی "زۆر باش" به‌ڕێوه ده‌چێت.
بایدن که ته‌مه‌نی 83 ساڵه، له ڤیدیۆیه‌کدا له هه‌ژماری فه‌رمیی خۆی له پلاتفۆرمی "X" ئاشکرای کرد که کتێبی یاده‌وه‌رییه‌کانی به ناونیشانی "به‌ڵێنم پێ بده، ئه‌مریکا" (Promise Me, America) له 17ی تشرینی دووه‌می 2026دا بڵاو ده‌کرێته‌وه. ئه‌م ڕێکه‌وته ته‌نها چه‌ند هه‌فته‌یه‌ک دوای هه‌ڵبژاردنه‌کانی ناوه‌ڕاستی خولی ئه‌مریکا دێت. بایدن ئاماژه‌ی به‌وه کرد که کتێبه‌که‌ی باس له‌و ئاڵنگارییه گه‌ورانه ده‌کات که وه‌ک نه‌ته‌وه‌یه‌ک ڕووبه‌ڕوویان بوونه‌وه و ئه‌و هۆکارانه‌ش ڕوون ده‌کاته‌وه که وایان لێ کرد بڕیاره چاره‌نووسسازه‌کان بدات.
له نێو ئه‌و ڕووداوه دیارانه‌ی که بایدن له یاده‌وه‌رییه‌کانیدا تیشکیان ده‌خاته سه‌ر، بریتین لە هێرشی لایه‌نگرانی دۆناڵد ترەمپ بۆ سه‌ر ته‌لاری کاپیتۆڵ له 6ی کانونی دووه‌می 2021، هه‌روه‌ها جه‌نگی ئۆکرانیا و کشانه‌وه‌ی هێزه‌کانی ئه‌مریکا له ئه‌فغانستان. ئه‌م ڕووداوانه که کاریگه‌ریی قووڵیان له‌سه‌ر سیاسه‌تی ناوخۆیی و ده‌ره‌وه‌ی حکوومەتی واشنتن هه‌بوو، ته‌وه‌ری سه‌ره‌کیی کتێبه‌کە پێکهێنن. بایدن ده‌یه‌وێت له ڕێگه‌ی ئه‌م کتێبه‌وه تێڕوانینی خۆی بۆ ئه‌و قۆناغه هه‌ستیاره‌ی مێژووی ئه‌مریکا بۆ نه‌وه‌کانی داهاتوو جێبهێڵێت.
سه‌باره‌ت به باری ته‌ندروستی، بایدن که له ئایاری 2025دا (ته‌نها چوار مانگ دوای جێهێشتنی کۆشکی سپی) تووشبوونی به جۆرێکی مه‌ترسیداری شێرپه‌نجه‌ی پڕۆستات ڕاگه‌یاندبوو که په‌ڕیبووه‌وه بۆ ئێسکه‌کانی، دووپاتی کرده‌وه که ئێستا له ژێر چاره‌سه‌ری تیشکیدایه. ئه‌و وتی: "کاتێکی زۆر له‌گه‌ڵ خێزانه‌که‌م به‌سه‌ر ده‌به‌م و چاره‌سه‌ره‌کانیشم به ئاراسته‌یه‌کی زۆر باشدا ده‌ڕۆن." بایدن وه‌ک به‌ته‌مه‌نترین سه‌رۆک له مێژووی ئه‌مریکا که پۆسته‌که‌ی وه‌رگرتبێت، ئێستا له دوایین قۆناغی ژیانی سیاسی و که‌سیی خۆیدا خه‌ریکە ئه‌زموونه‌کانی کۆده‌کاته‌وه.
