بەرپرسێکی باڵای ئەمریکا ڕایگەیاند، لە ئێستادا محەمەد باقر قالیباف، سەرۆکی پەرلەمانی ئێران، وەک کاریگەرترین و پڕهەژموونترین کەسایەتی لە ناو جومگەکانی بڕیاردانی کۆماری ئیسلامی ئێراندا دەردەکەوێت.
ئەو بەرپرسە ئەمریکییە ئاماژەی بەوە کردووە، هەڵسەنگاندنە هەواڵگری و سیاسییەکانی واشنتن دەریانخستووە کە هاوسەنگیی هێز لە ناو تاران گۆڕانکاری بەسەردا هاتووە و قالیباف توانیویەتی پێگەی خۆی وەک "بەهێزترین پیاوی ناو سیستەمەکە" بچەسپێنێت. ئەمەش لە کاتێکدایە کە ناوبراو نەک تەنها لە ڕووی یاسادانانەوە، بەڵکو لە دۆسیە هەستیارەکانی پەیوەست بە ئاسایشی نەتەوەیی و سیاسەتی دەرەوەی ئێرانیشدا ڕۆڵی سەرەکی و یەکلاکەرەوە دەگێڕێت.
بە وتەی ئەو سەرچاوە ئەمریکییە، ئەم کێش و قورساییەی قالیباف لە ناو دەسەڵاتدا، وایکردووە ببێتە لایەنی سەرەکی لە هەر گفتوگۆ یان ڕێککەوتنێکی نێودەوڵەتی کە پەیوەندی بە ئێرانەوە هەبێت. جەختیشی کردەوە کە قالیباف ئێستا وەک "ناوەندی بڕیار" سەیر دەکرێت و هەژموونەکەی بەسەر دامەزراوە جیاوازەکانی ناو دەوڵەتدا، وایکردووە پێش زۆرێک لە بەرپرسانی تری ئێران بکەوێت.
ئەم لێدوانە لە کاتێکدایە کە ناوچەکە و کۆمەڵگەی نێودەوڵەتی بە وردی چاودێری گۆڕانکارییەکانی ناو هەڕەمی دەسەڵاتی ئێران دەکەن، بەتایبەت لەم قۆناغەدا کە تاران لەبەردەم بڕیارە چارەنووسسازەکاندایە سەبارەت بە دۆسیە ناوچەیی و نێودەوڵەتییەکان.
