وەزارەتی ناوخۆی بەریتانیا ڕایگەیاند کە لە تەممووزی 2024ەوە تا ئێستا، زیاتر لە 80,000 تاوانبار و سەرپێچیکاری یاساکانی کۆچ دیپۆرت کراونەتەوە بۆ وڵاتەکانیان، ئەمەش بەرزترین ئاستی گەڕاندنەوەیە کە لە دوای ساڵی 2016ەوە لەو وڵاتەدا تۆمار کرابێت.
بەپێی ئامارە نوێیەکانی حکوومەت، ڕێژەی گەڕاندنەوەی ئەو کەسانەی بە شێوەی نایاسایی چوونەتە ناو بەریتانیا یان یاساکانی ئەو وڵاتەیان بەزاندووە، گەیشتووەتە ئاستێکی پێوانەیی لە ماوەی نزیکەی دە ساڵی ڕابردوودا. وەزارەتی ناوخۆ لە پەیامێکی تونددا جەختی کردەوە کە هەر کەسێک بە نایاسایی بێتە ناو بەریتانیا یان یاساکانی وڵاتەکە بپێچێتەوە، ڕەوانەی وڵاتی خۆی دەکرێتەوە.
ئەم هەنگاوەی لەندەن وەک بەشێک لە ستراتیژیی نوێی حکوومەت دەبینرێت بۆ توندکردنەوەی ڕێکارەکانی کۆچ و کەمکردنەوەی ڕێژەی تاوان کە لەلایەن هاووڵاتییانی بیانییەوە ئەنجام دەدرێن. بەرپرسانی وەزارەتی ناوخۆ دەڵێن ئامانجیان ئەوەیە پەیامێکی ڕوون بدەنە ئەو کەسانەی بە نایاسایی دەگەنە بەریتانیا، کە هیچ دەرفەتێکی مانەوەیان نابێت ئەگەر پابەندی یاساکان نەبن.
پاشبنەما
پرسی کۆچی نایاسایی و دیپۆرتکردنەوەی تاوانبارانی بیانی یەکێکە لە بابەتە هەرە هەستیار و لەپێشینەکانی ناوخۆی بەریتانیا. لە ساڵانی ڕابردوودا، فشارە سیاسی و جەماوەرییەکان زیادیان کردووە بۆ توندترکردنی ڕێکارەکانی سەر سنوور و خێراکردنی پڕۆسەی گەڕاندنەوەی ئەو کەسانەی مافی مانەوەیان نییە. حکوومەتە یەک لە دوای یەکەکانی بەریتانیا هەوڵیان داوە لە ڕێگەی ڕێککەوتنی دووقۆڵی لەگەڵ وڵاتانی تر، پڕۆسەی دیپۆرتکردنەوە خێراتر بکەن تاوەکو کێشەی قەرەباڵغیی زیندانەکان و تێچووی کۆچی نایاسایی کەم بکەنەوە.
