وەزارەتی ناوخۆی بەریتانیا ڕایگەیاند، کە ئەو پەنابەرانەی پێشتر خاکی وڵاتەکەیان جێهێشتووە، ئەگەر لە داهاتوودا هەوڵی گەڕانەوە بۆ بەریتانیا بدەن، چاوەڕوان دەکرێت تێچووی ئەو نیشتەجێبوون و هاوکارییە داراییانەی پێشتر وەریانگرتووە، بگەڕێننەوە.
بەپێی ڕێنماییە نوێیەکانی حكوومەت، ئەم مەرجە داراییە وەک بەرپرسیارێتییەک دەخرێتە سەر شانی ئەو پەنابەرانەی کە دەیانەوێت دووبارە بگەڕێنەوە ناو سیستەمی پەنابەریی وڵاتەکە. حكوومەتی بەریتانیا ئامانجیەتی لە ڕێگەی ئەم بڕیارەوە فشارە داراییەکانی سەر بودجەی گشتی کەم بکاتەوە و ڕێگری لە دووبارەبوونەوەی خەرجییەکان بکات بۆ ئەو کەسانەی پێشتر لە هاوکارییەکانی دەوڵەت سوودمەند بوون.
ئەم هەنگاوە وەک بەشێک لە پلانە چاکسازییەکانی حكوومەت لە دۆسیەی کۆچبەراندا دەبینرێت، کە تێیدا جەخت لەسەر شەفافیەت و بەرپرسیارێتیی دارایی دەکرێتەوە بۆ دڵنیابوونەوە لە بەکارهێنانی دروستی سەرچاوە گشتییەکان لە ساڵی 2026 و ساڵانی داهاتوودا.
