وەزارەتی ناوخۆی بەریتانیا (Home Office) لە بڕیارێکی نوێدا ڕایگەیاند، کە کۆمەڵێک ڕێڕەوی یاسایی و سەلامەت بۆ وەرگرتنی پەنابەران دەکاتەوە، ئەمەش بە ئامانجی کەمکردنەوەی کۆچی نایاسایی و دابینکردنی دەرفەت بۆ ئەو کەسانەی شایستەی پاراستنن.
بەپێی ڕاگەیەندراوە فەرمییەکە، ئەم ڕێگە نوێیانە لە ڕێگەی سێ م میکانیزمی سەرەکییەوە دەبن، کە بریتین لە:
پشتیوانیی کۆمەڵایەتی (Community sponsorship): کە تێیدا ڕێکخراو و گروپە ناوخۆییەکان دەتوانن سپۆنسەری پەنابەران بکەن.
ڕێڕەوی خوێندن: ڕەخساندنی دەرفەت بۆ پەنابەران تاوەکو بە مەبەستی خوێندن بێنە بەریتانیا.
ڕێڕەوی کار: دابینکردنی ڤیزای کار بۆ ئەو پەنابەرانەی خاوەن کارامەیی و پسپۆڕین.
وەزارەتی ناوخۆ جەختی لەوە کردووەتەوە کە لە سەرەتای جێبەجێکردنی ئەم بڕیارەدا، ژمارەی وەرگیراوان "کەم دەبێت" و پرۆسەکە بە شێوەیەکی زۆر ورد کۆنتڕۆڵ دەکرێت. ئاماژە بەوەش دراوە کە پشکنینێکی توند (Strict screening) بۆ داواکاران ئەنجام دەدرێت و تەنها ئەو سپۆنسەرانە پەسەند دەکرێن کە مەرجەکانیان تێدایە.
ئامانج لەم توندوتۆڵییە، وەک وەزارەتەکە ئاماژەی پێ کردووە، "دڵنیابوونەوەیە لەوەی سیستمەکە تەنها پشتیوانی لە پەنابەرانی ڕاستەقینە دەکات و ڕێگری دەکرێت لە هەر جۆرە خراپ بەکارهێنان و دەستکاریکردنێکی ڕێکارەکان."
ئەم هەنگاوەی لەندەن وەک بەشێک لە ستراتیژی نوێی وڵاتەکە دەبینرێت بۆ ڕووبەڕووبوونەوەی قەیرانی کۆچبەران و هاندانی خەڵک بۆ ئەوەی لە جیاتی ڕێگە مەترسیدارەکان و بەکارهێنانی بەلەمی بچووک، پەنا بۆ ڕێگا یاساییەکان بەرن
