پارتی کۆماریی ئەمریکا پلانی داناوە بۆ ئەنجامدانی یەکەمین کۆنفرانسی گەورەی هەڵبژاردنە نۆرەییەکان لە شاری دالاس لە مانگی داهاتوودا. ئامانجی سەرەکیی ئەم هەنگاوە ئەوەیە کە دیموکراتەکان وەک لایەنێکی "دیلی دەستی چالاکوانانی باڵی چەپ" نیشان بدەن. بەپێی زانیارییەکانی ماڵپەڕی (Axios)، ئەم ستراتیژییە نوێیە لە کاتێکدایە کە ئاستی ڕەزامەندی لە ترەمپ بۆ نێوان 30% دابەزیوە و جەنگی ئێران باری دارایی وڵاتی قورس کردووە.
بەرپرسانی پارتی کۆماری نایانەوێت هەڵبژاردنەکانی 3ی تشرینی دووەم تەنها وەک ڕیفراندۆمێک لەسەر سەرۆکایەتیی ترەمپ دەربکەوێت. بۆیە، هەڵمەتێکی فراوان لەژێر دروشمی "بەڵام ئەوان خراپترن" ئامادە دەکەن کە تێیدا سۆسیالیزم و باڵی پێشکەوتنخوازی ناو دیموکراتەکان دەکەنە ئامانج. ئەوان بڕیاریان داوە لە ڕۆژانی 9 و 10ی ئەیلوولدا، زنجیرەیەک ڤیدیۆ و بەڵگە لەسەر چالاکوانانی چەپ بڵاو بکەنەوە تاوەکو دەنگدەران لە بەرەی بەرامبەر بترسێنن.
ڕێکخەرانی کۆنفرانسەکە بەتایبەتی فۆکەس دەخەنە سەر "عەبدولسەید"، کاندیدی دیموکراتەکان بۆ سێنات لە میشیگن، کە لایەنگری دابینکردنی بیمەی تەندروستییە بۆ هەمووان و ڕەخنە لە ئیسرائیل دەگرێت. ترەمپ پێشتر ئەم کاندیدە موسڵمانەی بە "کۆمۆنیست" و "پیاوی ڕق و کینە" وەسف کردووە. لە بەرامبەردا، کۆمارییەکان دەیانەوێت لایەنگرانی خۆیان قایل بکەن کە تەنها ئەوان خەریکی چارەسەرکردنی کێشە سەرەکییەکانی وەک باج و ئاسایشی سنوورەکانن.
لەم کۆنفرانسەدا کە لە تەلاری "ئەمەریکان ئێرلاینز" بەڕێوەدەچێت، یادی یەکەمین ساڵڕۆژی تیرۆرکردنی "چارلی کێرک" دەکرێتەوە. بڕیارە جەی دی ڤانس، جێگری سەرۆک لە 9ی ئەیلوول و دۆناڵد ترەمپ لە 10ی ئەیلوول وتارەکانیان پێشکەش بکەن. هەروەها بەرپرسانی باڵای وەک مارکۆ ڕۆبیۆ و سکۆت بێسێنت دەورێکی سەرەکییان دەبێت، هاوکات لەگەڵ ئامادەبوونی کەسایەتییەکانی جیهانی (UFC) و ناودارانی تری ئەمریکا.
سەرەڕای ئەم ئامادەکارییانە، کۆمارییەکان لەبەردەم تەحەدایەکی گەورەدان. بەپێی ڕاپرسسییەکی نوێی کەناڵی (CNN)، نزیکەی 73%ی خەڵک پێیان وایە ترەمپ بایەخی پێویست بە کێشە ناوخۆییەکان نادات. هەروەها 65%ی بەشداربووان دەڵێن سیاسەتەکانی سەرۆک بارودۆخی ئابوورییان خراپتر کردووە. ئەم داتایانە وای کردووە کۆنفرانسەکەی دالاس ببێتە تاقیکردنەوەیەکی یەکلاکەرەوە بۆ ئەوەی بزانرێت ئایا کۆمارییەکان دەتوانن ڕای گشتی بگۆڕن یان نا.
لە لایەکی دیکەوە، پارتی دیموکرات بڕیاری داوە هیچ کۆنفرانسێکی هاوشێوە ئەنجام نەدات. وتەبێژی دیموکراتەکان ڕەخنەی توندی لەم هەنگاوەی کۆمارییەکان گرت و ڕایگەیاند، لە کاتێکدا ئەمریکییەکان خەریکی ململانێن بۆ دانەوەی پسوولەکانیان و پڕکردنی باکی ئۆتۆمبێلەکانیان، کۆمارییەکان ملیۆنان دۆلار خەرج دەکەن تەنها بۆ ڕازیکردنی "خۆپەرستیی" دۆناڵد ترەمپ و شاردنەوەی کارنامە شکستخواردووەکەی لە جەنگ و ئابووریدا.
