وانگ یی، وەزیری دەرەوەی چین، لە پەیوەندییەکی تەلەفۆنیدا بە مارکۆ ڕووبیۆ، وەزیری دەرەوەی ئەمریکای ڕاگەیاند کە باشکردنی پەیوەندییەکانی نێوان پەکین و واشنتن پێویستی بە "گرتنەبەری هەنگاوی کردەیی" هەیە. وانگ جەختی کردەوە کە بونیادنانی پەیوەندییەکی بونیادنەر و خاوەن سەقامگیریی ستراتیژی تەنها دروشم نییە، بەڵکو پێویستی بە نزیکبوونەوەی هەردوو لایەن و بەردەوامیی هەوڵەکان هەیە.
ئەم گفتوگۆ دیپلۆماسییە لە کاتێکدایە کە گرژییەکانی نێوان هەردوو زلهێزەکە لە چەندین بواری جیاوازدا، لەوانە بازرگانی، باجی گومرگی و پرسە جیۆپۆلیتیکییەکان گەیشتووەتە ئاستێکی بەرز. هەرچەندە دۆناڵد ترەمپ، سەرۆکی ئەمریکا، لە مانگی ئایاری ڕابردوودا سەردانی پەکینی کرد و لەگەڵ شی جینپینگ کۆبووەوە بە مەبەستی هێورکردنەوەی دۆخەکە، بەڵام جیاوازییەکان لەسەر سزاکانی واشنتن بۆ سەر کۆمپانیا تەکنەلۆژییەکانی چین هێشتا بە قووڵی ماونەتەوە.
لە مانگی حوزەیراندا، حکوومەتی چین وەک پەرچەکردارێک بەرامبەر بە خستنە ناو "لیستی ڕەش"ی کۆمپانیا تەکنەلۆژییەکانی، سنوورداریی لە هەناردەکردن بەسەر 10 کۆمپانیای ئەمریکیدا سەپاند کە لە بوارەکانی بەرگری و کانزا دەگمەنەکاندا کار دەکەن. وانگ یی لە پەیوەندییە تەلەفۆنییەکەیدا ئاماژەی بەوە کردووە کە پێویستە هەردوو لایەن کار بۆ کورتکردنەوەی لیستی کێشەکانی نێوانیان بکەن و ڕێگری لە پەرەسەندنی مەترسییە شاراوەکان بگرن.
سەبارەت بە پرسی تایوان، وەزیری دەرەوەی چین پەیامێکی توندی ئاراستەی واشنتن کرد و ڕایگەیاند کە ئەم پرسە کاریگەریی دوورمەودای دەبێت. وانگ هیوای خواست کە ئەمریکا "بەوپەڕی وریاییەوە" مامەڵە لەگەڵ پرسەکانی پەیوەست بە تایوان بکات. ئەم هۆشدارییە لە کاتێکدایە کە حکوومەتی ئەمریکا لە ئێستادا خەریکی پێداچوونەوەیە بە گرێبەستێکی فرۆشتنی چەک بە بەهای 14 ملیار دۆلار بە تایوان، ئەمەش وەک پاڵپشتییەک بۆ تاپیێ لە بەرامبەر فشارە سەربازییەکانی چین کە لە مانگەکانی ڕابردوودا لە دەوروبەری دوورگەکە چڕی کردوونەتەوە.
