ئامارە نوێیەکانی ڕاپرسسی و نیشاندەرە ئابوورییەکان وێنایەکی نادڵنیا بۆ خولی دووەمی سەرۆکایەتیی دۆناڵد ترەمپ نیشان دەدەن. بەپێی ڕاپرسسییەکی نوێی دامەزراوەی "کوینپیاک"، ئاستی ڕەزامەندی لە کارەکانی ترەمپ بۆ نزمترین ئاست دابەزیوە و گەیشتووەتە 32%، هاوکات 68%ی دەنگدەران پێیان وایە سەرۆک فۆکەسی لەسەر کێشە سەرەکییەکانی ئەمریکییەکان نییە.
تەنانەت لە ناو بازنەی نزیکی سەرۆکیشدا، نیگەرانی لەوە هەیە کە ترەمپ کەوتبێتە ناو "تەڵەی" جەنگێکی نەخوازراو لەگەڵ ئێران، سەپاندنی باجی گومرگیی زیانبهخش و خولیای بونیادنانی مۆنیومێنتەکان. چاودێران ئاماژە بەوە دەکەن کە ئەم سێ بابەتە زۆربەی کات و سەرنجی ترەمپیان گرتووە، لە کاتێکدا لە ناو شەقامی ئەمریکیدا بە شێوەیەکی بەرفراوان ناپەسندن.
زانیارییە دزەپێکراوەکان باس لەوە دەکەن کە ترەمپ نزیکەی70%ی بیرکردنەوەکانی تەرخان کردووە بۆ پڕۆژەکانی نۆژەنکردنەوەی کۆشکی سپی و دروستکردنی پەیکەرەکان، کە وەک بەشێک لە "میراتی مێژوویی" خۆی دەیانبینێت. ئەمە بووەتە هۆی بێئومێدبوونی لایەنگرانی پارتی کۆماری، چونکە پێیان وایە سەرۆک لە واقیع دابڕاوە و ئامادە نییە ئەو 400 ملیۆن دۆلارەی لە سندوقی پاڵپشتیی (MAGA Inc) کۆکراوەتەوە، بۆ کێبڕکێ هەڵبژاردنەکان خەرج بکات.
لە ئاستی یاسادانانیشدا، ترەمپ تەواوی قورسایی خۆی خستووەتە سەر پڕۆژەیاسای "پاراستنی ئەمریکا" (SAVE America Act) کە مەرجی ناسنامەی توند بۆ دەنگدەران دادەنێت. سەرەڕای ئەوەی سەرکردە کۆمارییەکان پێیان ڕاگەیاندووە کە ئەم پڕۆژەیە هیچ چانسێکی تێپەڕبوونی لە ئەنجوومەنی پیران نییە، بەڵام ترەمپ سوورە لەسەری و هێرش دەکاتە سەر جۆن سون، سەرۆکی زۆرینەی کۆمارییەکان لە سێنات.
بەرپرسانی باڵای کۆنگرێس هۆشداری دەدەن کە ئەم دۆخە لەوانەیە ببێتە هۆی لەدەستدانی زۆرینەی کۆمارییەکان لە ئەنجوومەنی نوێنەران و پیران لە هەڵبژاردنە نۆرەییەکاندا. هەندێک لە هاوکارانی بە ناڕاستەوخۆ داوای لێ دەکەن فۆکەسی بخاتە سەر بژێوی خەڵک و ئابووری، بەڵام دەڵێن سەرۆکە تەمەن 80 ساڵانەکە هێندە سەرسەختە کە ئامادە نییە ئاڕاستەی سیاسەتەکانی بگۆڕێت.
لە جیاتی ڕووبەڕووبوونەوەی قەیرانەکان، ترەمپ زۆربەی کات سەرقاڵی نیشاندانی دیزاینی هۆڵە نوێیەکانی کۆشکی سپی، فڕۆکە نوێیەکەی (Air Force One) و دروستکردنی ناوەندی نوێی نیشتنەوەی کۆپتەرەکانە. یەکێک لە نزیکەکانی ترەمپ دەڵێت: "هاوینی ساڵی شەشەمی سەرۆکایەتی لە ڕووی مێژووییەوە هەمیشە بۆ سەرۆکەکان کارەساتبار بووە،" و وا دیارە ئەمساڵیش بۆ ترەمپ جیاواز نابێت
