وەزارەتی دەرەوەی فەڵەستین، لە بەیاننامەیەکی فەرمیدا بە توندترین شێوە سەرکۆنەی ئەو هێرشە ئێرانییەی کرد کە هەرێمی کوردستانی کردووەتە ئامانج.
وەزارەتی دەرەوەی فەڵەستین ڕایگەیاند، ئەم هێرشە بە پێشێلکارییەکی ئاشکرای سەروەریی عێراق و دەرچوون لە بنەماکانی یاسای نێودەوڵەتی دادەنرێت، جەختیشی کردەوە کە ئەم جۆرە کارانە هەڕەشەی ڕاستەقینە لە ئاسایش و سەقامگیریی ناوچەکە دەکەن.
لە بەشێکی دیکەی بەیاننامەکەدا هاتووە، دەوڵەتی فەڵەستین هاوسۆزیی تەواوی خۆی لەگەڵ عێراق و هەرێمی کوردستان دەردەبڕێت و پشتگیریی هەموو ئەو هەوڵانە دەکات کە
ئامانجیان پاراستنی سەروەری و چەسپاندنی ئاسایش و سەقامگیرییە، بە مەبەستی دوورخستنەوەی ناوچەکە لە ئاڵۆزی و گرژیی زیاتر.
