وەزارەتی ناوخۆی بەریتانیا ڕایگەیاند کە هێزەکانی پۆلیسی ویلایەتی ئێسێکس (Essex Police) توانیویانە 5 ئەندامی باندێکی مەترسیداری تاوانکاری بە ناوی "دایمۆند" (Diamond) دەستگیر بکەن، کە بە شێوەیەکی دڕندانە دەستیان بەسەر ماڵی هاووڵاتییانی بێدەرەتاندا گرتبوو بۆ مەبەستی بازرگانیکردن بە ماددە بێهۆشکەرەکان.
ئەم باندە کە لە چوارچێوەی تۆڕە تاوانکارییەکانی ناسراو بە "کاونتی لاینز" (County Lines) کاریان دەکرد، لە ناوچەی برێنتری دەستیان بەسەر شوقەی 2 پیاوی نەخۆش و بێدەرەتاندا گرتبوو و پێیان وتبوون "ئەمە شوقەی ئێمەیە، نەک تۆ".
ئەندامانی ئەم باندە بە شێوەیەکی پلان بۆ داڕێژراو سوودیان لە باری نالەباری قوربانییەکان وەرگرتووە و ماڵەکانیانیان کردووەتە بنکەیەک بۆ ئامادەکردن و فرۆشتنی ماددە بێهۆشکەرەکان. تاوانبارەکان نەک تەنها کلیلی ماڵ و مۆبایلی قوربانییەکانیان دزیوە، بەڵکو بە ئەنقەست ئاڵودەبوونی ئەو کەسانەیان بە ماددەی بێهۆش نوێ کردووەتەوە بۆ ئەوەی هەمیشە لە ژێر کۆنترۆڵی ئەواندا بمێننەوە. دوای دەستگیرکردنیان و کۆکردنەوەی بەڵگەکان، هەموو ئەندامانی باندەکە لە دادگا مەحکووم کران و سزای زیندانییان بەسەردا سەپێنرا، کە تێیدا سەرۆکی باندەکە سزای نزیکەی 5 ساڵ زیندانیکردنی بۆ بڕایەوە.
ئەم ئۆپەراسیۆنە سەرکەوتووە لە کاتێکدایە کە بەرنامەی نیشتمانیی بەریتانیا بۆ بەرەنگاربوونەوەی "کاونتی لاینز" لە ساڵی 2025/26دا، بەهێزترین و سەرکەوتووترین ساڵی خۆی لە مێژوودا تۆمار کردووە. بەپێی ئامارە فەرمییەکانی وەزارەتی ناوخۆ، تەنها لە ماوەی ئەمساڵدا زیاتر لە 7,300 کەس بە تۆمەتی بازرگانیکردن بە ماددە بێهۆشکەرەکان دەستگیرکراون و زیاتر لە 4,700 کەسی بێدەرەتان و قوربانی کە لە لایەن باندەکانەوە چەوسێنرابوونەوە، ڕەوانەی ناوەندەکانی پاڵپشتی کراون بۆ وەرگرتنی هاوکاریی دەروونی و کۆمەڵایەتی.
هەر لە چوارچێوەی ئەم هەڵمەتە بەرفراوانەدا، هێزە ئەمنییەکان توانیویانە زیاتر لە 2,800 هێڵی تەلەفۆنی و تۆڕی گواستنەوەی ماددە بێهۆشکەرەکان بە تەواوی دابخەن و لەناویان ببەن. حکومەتی بەریتانیا جەخت دەکاتەوە کە بەردەوام دەبن لە توندکردنی ڕێکارەکان دژی ئەو تاقم و گروپانەی کە سوود لە کەسانی لاواز دەبینن بۆ کارە نایاساییەکانیان، و ئاماژە بەوە دەکەن کە ئەم ئەنجامانە نیشانەی پابەندیی تەواوی دەوڵەتە بە پاککردنەوەی شارەکان لە مەترسیی باندە تاوانکارییەکان و پاراستنی سەلامەتیی هاووڵاتییان.
