لە ئەنجامی وەرگەڕانی پاسێکی گەشتیاریی پۆڵەندی لەسەر یەکێک لە شاڕێ سەرەکییەکانی وڵاتی هەنگاریا، لانی کەم 12 کەس گیانیان لەدەستدا و 10 کەسی دیکەش بە سەختی بریندار بوون.
پیتەر مادیار، سەرۆک وەزیرانی هەنگاریا و دەزگا ئەمنییەکانی ئەو وڵاتە، بەیانی ئەمڕۆ یەکشەممە (16ی ئابی 2026) ڕووداوەکەیان پشتڕاست کردەوە.
بەپێی بەیاننامەیەکی فەرمیی پۆلیسی هەنگاریا، ڕووداوەکە لە کاتژمێر 1:00ی بەرەبەیاندا لەسەر شاڕێی M3 لە نزیک ناوچەی "مێزۆکێرێستێس" ڕوویداوە، کە دەکەوێتە ڕۆژهەڵاتی بوداپێستی پایتەخت. پاسەکە بە هۆکارێکی نادیار کۆنتڕۆڵی لەدەستداوە و وەرگەڕاوە، ئەمەش بووەتە هۆی دروستبوونی کارەساتێکی مرۆیی لەو ناوچەیەدا.
تیمەکانی فریاگوزاری و پۆلیس دەستبەجێ گەیشتوونەتە شوێنی ڕووداوەکە و بریندارەکانیان بۆ نەخۆشخانەکانی دەوروبەر گواستووەتەوە. پۆلیس ڕایگەیاندووە کە لێکۆڵینەوەی وردیان لەبارەی هۆکاری وەرگەڕانی پاسەکە دەستپێکردووە، لە کاتێکدا کە بارودۆخی تەندروستیی هەندێک لە بریندارەکان بە "ناجێگیر" وەسف کراوە.
