کیم جونگ ئۆن، ڕابەری کۆریای باکوور، لەگەڵ هاوسەر و کچەکەی لە پێشانگایەکی گەورەی پیشەسازیی جل‌وبەرگ و پێڵاو دەرکەوت. ئەم ئامادەبوونە ڕەتکردنەوەیەکی کرداری و قایمی زنجیرە شایەتییە بەرفراوانەکانی میدیای بەریتانی و ڕۆژئاوا بوو کە بانگەشەیان دەکرد ناوبراو تووشی خوێن‌ڕژانی مێشک بووە و لە نەخۆشخانەیەک لە چین کۆچی دوایی کردووە.
دەرکەوتنی کیم دوای ئەوە ڕوویدا کە لە چەند ڕۆژی ڕابردوودا، ڕۆژنامەی «د سان» و ژمارەیەک لە میدیاکانی بەریتانی، بە پشتبەستن بە شایەتییە ناڕوونەکانی چالاکێکی چینی، بڵاویان کردەوە کە تەندروستیی ڕابەری کۆریای باکوور لە دۆخێکی زۆر خراپدایە و بەهۆی نەبوونی تواناکانی پزیشکیی پێویست لە وڵاتەکەی، بە شێوەیەکی فۆری بۆ نەخۆشخانەی پزیشکیی یۆنیین لە پەکین گوازراوەتەوە. شایەتییەکان تەنانەت گەیشتبوونە ئەو ئاستەی کە بانگەشەی بێهۆشبوون، مردن و گەڕاندنەوەی نهێنیی تەرمەکەییان دەکرد، لەگەڵ بڵاوکردنەوەی ئەو بانگەشەیەی کە پەکین نزیکەی ۹,۰۰۰ سەربازی بۆ پیۆنگیانگ ناردووە تا دەسەڵات بەبێ ڕوودانی شەڕی ناوخۆ بگوازرێتەوە بۆ «کیم جو ئێ»، کچەکەی.
بەڵام ئاژانسی فەرمیی هەواڵی کۆریای باکوور بە بڵاوکردنەوەی وێنە و ڤیدیۆی سەردانی ئەمڕۆ سێشەممەی کیم جونگ ئۆن، هەموو ئەم پروپاگەندە و شایەتییانەی ڕەتکردەوە؛ کە تێیدا، ئەو بە تەندروستییەکی تەواو و لەگەڵ «ری سول جو» هاوسەرەکەی و کچەکەی، بە باشی لەنێو بەرهەمەکانی پێشانگاکەدا سەردانی دەکرد. لەم پێشانگایەدا زیاتر لە ۷۰,۷۰۰ پارچە جل‌وبەرگ لە ۳۰ جۆری جیاواز، لەگەڵ زیاتر لە ۱۷۰,۰۰۰ جووت پێڵاو لە ۶۰ مۆدێلی جۆراوجۆر کە بەرهەمی کارگە ناوخۆییەکانی ئەم وڵاتەن، خرانەڕوو.
ڕابەری کۆریای باکوور لە کاتی وتارێکدا، دڵخۆشیی خۆی لە پێشکەوتنی خێرای بەرهەمەکان دەربڕی و جەختی کردەوە کە ئەم دەستکەوتانە بەڵگەیەکی ڕوونن بۆ دروستی و پویاییی سیاسەتەکانی حیزبی دەسەڵاتدار بۆ لابردنی جیاوازیی نێوان شارەکان و ناوچە دوورەدەستەکان. ئەم هەنگاوە لە چوارچێوەی ئەو ستراتیژییەدا ئەنجام دەدرێت کە کیم لە ساڵی ۲۰۲۴دا بۆ دروستکردنی کارگەی نوێ لە ۲۰ شارۆچکە لە هەر ساڵێک و بۆ ماوەی ۱۰ ساڵ ڕایگەیاندبوو، بە ئامانجی بەرزکردنەوەی ژێرخانی خۆبژێویی هاووڵاتیان لە سەرانسەری وڵاتدا.
