">مایک پۆمپیۆ وەزیری پێشووی دەرەوەی ئەمریکا لە پێنجەمین ساڵیادی تەقینەوە خۆکوژییەکەی فڕۆکەخانەی کابوول، هێرشێکی توندی کردە سەر ئیدارەی جۆ بایدن و کشانەوەی هێزەکانی وڵاتەکەی لە ئەفغانستان بە شەرمەزاری ناوبرد. پۆمپیۆ جەختی لەوە کردەوە کە نابێت تێچووی ئەو بڕیارە لە یاد بکرێت، کە بووە هۆی کوژرانی ژمارەیەکی زۆر لە خەڵکی سڤیل و سەربازانی ئەمریکی.
لە پەیامێکدا کە لە هەژماری فەرمی خۆی بڵاوی کردووەتەوە، پۆمپیۆ ئاماژەی بەوە کرد کە پێنج ساڵ لەمەوبەر لە دەروازەی (Abbey Gate)ی فڕۆکەخانەی کابوول، بەهۆی تەقینەوەیەکی خۆکوژییەوە زیاتر لە 180 کەس کوژران، كه 13یان سەربازی هێزە چەکدارەکانی ئەمریکا بوون. وەزیری پێشووی دەرەوە داوای کرد ڕێز لە قوربانیدانی ئەو جەنگاوەرە ئازایانە بگیرێت و ئاماژەی بەوە کرد کە کشانەوەکە زیانێکی گەورەی بە پێگەی ئەمریکا گەیاندووە.
کشانەوەی هێزەکانی ئەمریکا لە ئەفغانستان لە ئابی 2021، یەکێکە لەو دۆسیانەی کە مشتومڕێکی زۆری لە ناوخۆی ئەمریکا و جیهاندا دروست کردووە. لە کاتێکدا ئیدارەی بایدن بەرگری لە بڕیارەکە دەکات وەک کۆتاییهێنان بە درێژترین جەنگی مێژووی ئەمریکا، بەڵام نەیارە کۆمارییەکانیان ڕەخنەی توند لە شێوازی جێبەجێکردنی پڕۆسەکە دەگرن، کە بووە هۆی کۆنتڕۆڵکردنەوەی خێرای وڵاتەکە لەلایەن تاڵیبانەوە.
ئەو تەقینەوەیەی کە پۆمپیۆ ئاماژەی پێ کردووە، لەلایەن گرووپی داعش-خۆراسانەوە ئەنجامدرا و بە خوێناویترین ڕۆژ بۆ هێزەکانی ئەمریکا لە ئەفغانستان لە ماوەی دە ساڵی ڕابردوودا دادەنرێت.
