سەرۆک وەزیرانی بریتانیا: ئاماژەی بەهێز هەن لەسەر دەستێوەردانی ئێران لە پیلانێک بۆ بەئامانجگرتنی بنکەیەکی ئاسمانی

ڕووداوەکە لە بەیانیی ڕۆژی یەکشەممەوە دەستی پێکرد، کاتێک جووتیارێک پۆلیسی لە هەبوونی 3 ئۆتۆمبێلی بارهەڵگری گوماناوی و بینینی کۆمەڵێک پیاوی دەمامکدار لە نزیک بنکە ئاسمانییەکە ئاگادار کردەوە. دواتر پۆلیس 5 پیاوی بریتانیی بە گومانی تێوەگلان لە ماددەی تەقینەوە و تیرۆر دەستگیر کرد، بەڵام ڕۆژی سێشەممە بە کەفالەت ئازادی کردن و ڕایگەیاند کە هیچ تەقەمەنییەک لە شوێنەکە نەدۆزراوەتەوە، تەنیا دەست بەسەر بڕێک بەنزیندا گیراوە.

ئەم لێدوانەی سەرۆک وەزیران وەک یەکەم پشتڕاستکردنەوەی فەرمیی دەسەڵاتدارانی بریتانیا دادەنرێت سەبارەت بە گومانی دەستێوەردانی ئێران لەو ڕووداوەدا. پێشتریش دۆناڵد ترەمپ، سەرۆکی ئەمەریکا و مارکۆ ڕوبیۆ، وەزیری دەرەوەی ئەمریکا، ئاماژەیان بەوە کردبوو کە دەزگا هەواڵگرییەکان زانیارییان لەسەر گومانلێکراوەکان هەبووە و دەکرێت دەوڵەتێکی بیانی لە پشت بابەتەکەوە بێت.

لە بەرامبەردا، باڵیۆزخانەی ئێران لە لەندەن بە توندی ئەو تۆمەتانەی ڕەتکردەوە و ڕایگەیاند: "ئەمە گومانێکی بێبنەمایە و سەرکۆنەی دەکەین".

ئەم گرژییە ئەمنییە دوای ئەوە دێت کە حکوومەتی بریتانیا ڕێگەی بە هێزەکانی ئەمەریکا داوە بنکەی ئاسمانیی فەیرفۆرد لە ناوچەی گلۆستەرشایەر بەکاربهێنن بۆ ئەنجامدانی هێرشی بەرگری دژ بە ئێران، ئەمەش کاردانەوە و هۆشداریی توندی تارانی لێکەوتووەتەوە.