ناوەندەکانی ئەفریقا بۆ کۆنتڕۆڵکردن و خۆپاراستن لە نەخۆشییەکان، زەنگی مەترسیی لەبارەی بڵاوبوونەوەی خێرای ڤایرۆسی "ئیبۆلا" لە وڵاتی کۆنگۆ لێ دەدەن و ڕایدەگەیەنن، کە شەپۆلی ئەمجارە زۆر کوشندەترە لەو پەتایەی لە ساڵی 2014دا جیهانی هەژاند.
جان کاسیا، بەڕێوەبەری ناوەندەکە ئاشکرای کرد، کە تەنها لە مانگی ئایاری ڕابردووەوە تاوەکو ئێستا، ژمارەی تووشبووان بۆ یەکەمجار 4,000 کەسی تێپەڕاندووە. ئاماژەی بەوەش دا کە ئاستی بڵاوبوونەوەی ڤایرۆسەکە 8 هێندە و ڕێژەی گیانلەدەستدانیش 6 هێندە زیاترە بەراورد بەو شەپۆلە توندەی کە پێش 12 ساڵ ڕووی دا.
بەهۆی ئەو خێراییە سەرسوڕهێنەرەی لە گواستنەوەی نەخۆشییەکەدا دەبینرێت، ڕێکخراوی تەندروستی جیهانی (WHO) و ئاژانسی تەندروستی ئەفریقا لێكۆڵینەوەیەکی هاوبەشیان دەست پێکردووە. ئامانج لە لێکۆڵینەوەکە زانینی ئەوەیە کە ئایا جۆری "بوند بوجیۆ"ی ڤایرۆسەکە تووشی گۆڕانکاریی جینی (Mutation) بووە یان نا، کە وای لێ کردووە بە ئاسانی بگوازرێتەوە.
تاوەکو ئێستا زیاتر لە 1,800 کەس بەهۆی پەتایەکەوە گیانیان لەدەستداوە. ئەم دۆخە نائاساییە وای کردووە کۆماری کۆنگۆ بکەوێتە حاڵەتی ئامادەباشیی تەواوەوە، چونکە پزیشکان دەڵێن ئەمە "خێراترین بڵاوبوونەوەی ئیبۆلایە لە مێژوودا" و مەترسییەکی گەورەی لەسەر ئاسایشی تەندروستیی تەواوی کیشوەرەکە دروست کردووە.
