شۆن پارنێڵ وتەبێژی وەزارەتی جەنگی ئەمریکا (پنتاگۆن)، ڕاستی ئەو ڕاپۆرتانەی ڕەتکردەوە کە باس لە هەبوونی کەمی لە کۆگاکانی تەقەمەنی سوپای ئەمریکا دەکەن و جەختی کردەوە، سوپا هەموو ئەو پێداویستییانەی لەبەردەستدایە کە بۆ جێبەجێکردنی هێرشەکان لەو کات و شوێنەی سەرۆک دیارییان دەکات، پێویستن.
پارنێڵ بە ڕۆژنامەی Wall Street Journalـی ڕاگەیاند، ئەو دەنگۆیانەی باس لە نەمان یان کەمیی تەقەمەنی دەکەن ناڕاستن، و جەختیشی کردەوە کە سوپای ئەمریکا هێشتا بە بەهێزترین هێزی جەنگاوەر لەسەر زەوی دەمێنێتەوە.
ئەم ڕەتکردنەوەیەی پنتاگۆن دوای بڵاوبوونەوەی چەند ڕاپۆرتێک هات کە تێیاندا ئاماژە بەوە کرابوو، سوپای ئەمریکا لە ماوەی 5 مانگی جەنگ لەگەڵ ئێران، نزیکەی تەواوی کۆگای مووشەکە دوورهاوێژە وردەکانی بەکارهێناوە. هەروەها لە ڕاپۆرتەکاندا هاتبوو کە ئەمریکا نزیکەی 65%ـی مووشەکەکانی بەرگری سیستەمی Patriotـی لە نێوان مانگەکانی شوبات و تەمموزدا بەکارھێناوە.
لەلایەکی دیکەوە، ترەمپ ڕایگەیاند کە ئەمریکا تەقەمەنی لە هەر وڵاتێکی تری جیهان زیاترە و زۆر زیاتریشی هەیە لەوەی کە پێویستییەتی. ئاماژەی بەوەش کرد کە کۆمپانیاکانی بەرگری ئەمریکا بە ئاستێکی بێپێشینە کار بۆ بەرهەمهێنانی تەقەمەنی و فراوانکردنی دامەزراوەکانیان دەکەن.
هاوکات لەگەڵ ئەم لێدوانانەدا، پنتاگۆن داوای لە سەرۆکی کۆمپانیاکانی پیشەسازی بەرگری کردووە لە ماوەی 21 ڕۆژدا پلانێک بۆ خێراکردنی خشتەی ڕادەستکردنی چەکەکان و زیادکردنی توانای بەرهەمهێنانی سەربازی ئامادە بکەن، و جەختی کردەوە کە چیتر قبوڵکراو نییە پرۆسەکانی پەرەپێدان و بەرهەمهێنان چەندین ساڵ بخایەنن.
