کۆریای باکوور ڕایگەیاند کە قۆناغێکی نوێی پەرەپێدانی سەربازی دەستپێدەکات، کە تێیدا جەخت لەسەر بەهێزکردنی بەرچاوی جبەخانە ناوەکییەکەی و فراوانکردنی ئۆپەراسیۆنە هەواڵگرییەکانی دژی کۆریای باشوور دەکاتەوە. ئەم ڕاگەیاندنە نوێیە لە کاتێکدایە کە گرژییەکانی نیمچەدوورگەی کۆریا گەیشتوونەتە ئاستێکی مەترسیدار و هەوڵە دیپلۆماسییەکان بۆ داماڵینی چەکی ناوەکی بە تەواوی چەقبەستوون.
میدیای فەرمیی کۆریای باکوور ئاماژەی بەوە کردووە کە وڵاتەکەیان هێزە ناوەکییەکانی لە ڕووی "چەندایەتی و جۆرایەتییەوە" بەهێزتر دەکات. چاودێرانی سەربازی پێیان وایە مەبەست لە "چەندایەتی" زیادکردنی ژمارەی کڵاوە ناوەکییەکان و موشەکە کورت مەودا و دوور مەوداکانە، بەڵام مەترسییە گەورەکە لە "جۆرایەتی"دایە؛ کە بە واتای پەرەپێدانی تەکنەلۆژیای موشەکیی پێشکەوتووتر، وەک موشەکی کیشوەڕبڕ (ICBM) کە توانای بڕینی سیستەمە بەرگرییەکانی هەبێت، و کڵاوە ناوەکییە بچووکەکان (Tactical Nukes) دێت. ئەم هەنگاوە وەک وەڵامێکی ڕاستەوخۆ دەبینرێت بۆ زیادبوونی هەماهەنگییە سەربازییەکانی نێوان واشنتن، سیئۆل و تۆکیۆ، کە کۆریای باکوور وەک هەڕەشەیەک بۆ سەر بوونی خۆی وەسفیان دەکات.
تەوەرێکی دیکەی ئەم بڕیارە نوێیە بریتییە لە بەهێزکردن و فراوانکردنی ڕۆڵی دەزگای هەواڵگریی سەربازیی وڵاتەکە (RGB)، کە ئەرکی سەرەکیی چاودێریکردنی کۆریای باشوورە. پیۆنگیانگ دەیەوێت تواناکانی لە بواری جەنگی سایبەری، کۆکردنەوەی زانیاریی وردی سەربازی و چاودێریکردنی جووڵەی هێزەکانی هاوپەیمانان لە باشوور زیاد بکات. شارەزایانی سایبەری هۆشداری دەدەن کە ئەم فراوانکردنە دەکرێت ببێتە هۆی زیادبوونی هێرشە ئەلیکترۆنییەکان بۆ سەر ژێرخانە هەستیارەکانی کۆریای باشوور، لەوانەش بانکەکان و تۆڕەکانی وزە، جگە لە ئەگەری ناردنی سیخوڕی زیاتر بۆ ناو خاکی دراوسێیە باشوورییەکەی.
ئەم بڕیارەی کۆریای باکوور پێشێلکردنی ئاشکرای بڕیارنامەکانی ئەنجومەنی ئاسایشی نێودەوڵەتییە، بەڵام پیۆنگیانگ چەندین جار جەختی کردووەتەوە کە بەرنامە ناوەکییەکەی تەنها بۆ مەبەستی "بەرگرییە". لە بەرامبەردا، کۆریای باشوور ڕایگەیاندووە کە بە وردی چاودێری ئەم پەرەسەندنانە دەکات و ئامادەیی تەواوی هەیە بۆ وەڵامدانەوەی هەر جۆرە "ئیستیفزازێک". ئەم پەرەسەندنە نیشانەی ئەوەیە کە نیمچەدوورگەی کۆریا بەرەو پێشبڕکێیەکی نوێی پڕچەککردن هەنگاو دەنێت، کە تێیدا دیپلۆماسییەت جێگەی خۆی بۆ هێزی سەربازی و جەنگی هەواڵگری چۆڵ کردووە، ئەمەش مەترسیی پێکدادانی هەڵە یان پلان بۆ داڕێژراو لە ناوچەکەدا زیاتر دەکات.
