مارکۆ ڕوبیۆ، وەزیری دەرەوەی ئەمریکا ڕایگەیاند، واشنتن ئارەزووی گەیشتن بە ڕێککەوتن لەگەڵ ئێران دەکات، بەڵام جەختی کردەوە کە دەبێت پلانێکی جێگرەوە و ئامادەکراویان هەبێت ئەگەر تاران ڕەتبکاتەوە گەرووی هورمز بە ڕووی کەشتیوانیدا بکاتەوە.
ڕوبیۆ ئاماژەی بەوە کرد کە تاوەکو ئێستا ئەمریکا داوایەکی دیاریکراوی ئاراستەی هاوپەیمانی ناتۆ نەکردووە بۆ وەرگرتنی هاوکاری لەبارەی دۆخی گەرووی هورمز، بەڵام وڵاتەکەی لە هەماهەنگی بەردەوامدایە لەگەڵ چەندین دەوڵەت بۆ چارەسەرکردنی ئەم قەیرانە. ناوبراو ئاشکرای کرد کە پاکستان لە ئێستادا وەک نێوەندگیری سەرەکی لە گفتوگۆکانی نێوان واشنتن و تاران ڕۆڵ دەگێڕێت و هەوڵەکان بۆ دۆزینەوەی دەرچەیەک لە ڕێگەی ئیسلام ئابادەوە بەردەوامییان هەیە.
ئەم لێدوانانەی وەزیری دەرەوەی ئەمریکا لە کاتێکدایە کە گرژییەکان لە ئاوەکانی ناوچەکە گەیشتوونەتە ئاستێکی مەترسیدار و داخستنی گەرووی هورمز هەڕەشە لە ئاسایشی وزەی جیهانی دەکات. گەرووی هورمز یەکێکە لە گرنگترین ڕێڕەوە ئاوییەکان بۆ گواستنەوەی نەوت، هەر بۆیە واشنتن نایەوێت ڕێگە بدات ئەم ناوچە ستراتیژییە بۆ ماوەیەکی درێژ بە داخراوی بمێنێتەوە و کار بکاتە سەر بازاڕەکانی جیهان.
چاودێرانی سیاسی پێیان وایە ئاماژەکردن بە "پلانێکی بەدیل" لەلایەن ڕوبیۆوە، نیشانەی ئەوەیە کە ئیدارەی ئەمریکا ئامادەکاری بۆ هەموو ئەگەرەکان دەکات، لەوانەش بژاردەی فشارە ئابوورییە توندترەکان یان ڕێکاری دیکەی پێویست. لە هەمان کاتدا، پشت بەستن بە پاکستان وەک نێوەندگیر، هەوڵێکی دیپلۆماسییە بۆ ئەوەی بوار بە تاران بدرێت بەبێ هەڵگیرسانی پێکدادانی گەورە، پاشەکشە لە بڕیارەکانی بکات و بگەڕێتەوە بۆ مێزی گفتوگۆ.
