سەرۆکی ئەمریکا ڕایگەیاند، ئێستا بۆ وەرگرتنی بڕیاری کۆتایی سەبارەت بە ئێران، لە ژووری ئۆپەراسیۆنەکان کۆدەبێتەوە و گەمارۆ دەریاییەکان هەڵدەگیرێت و ئەو کەشتییانەی لە گەرووی هورمز گیریان خواردووە، دەتوانن بگەڕێنەوە بۆ نیشتمان.
ئەمڕۆ هەینی 29ـی ئایار، دۆناڵد ترەمپ، سەرۆکی ئەمریکا لە (ترووس سۆشیاڵ) ڕایگەیاند: ئێستا لە ژووری ئۆپەراسیۆنەکان کۆدەبمەوە بۆ وەرگرتنی بڕیاری کۆتایی سەبارەت بە ئێران دەبێت ئێران ڕازی بێت بەوەی کە هەرگیز نابێتە خاوەنی چەک یان بۆمبی ئەتۆمی.
هەروەها گوتی: "دەبێت بەپەلە و بەبێ هیچ رسوماتێکی تێپەڕبوون، گەرووی هورمز بە ڕووی جووڵەی کەشتیوانیی بێکۆتوبەنددا بە هەردوو ئاراستەکەدا بکرێتەوە".
سەرۆکی ئەمریکا دەشڵێت: "ئێستا گەمارۆ دەریاییەکەمان هەڵدەگیرێت و ئەو کەشتییانەی لە گەرووەکەدا گیریان خواردووە، دەتوانن دەست بە پڕۆسەی گەڕانەوە بۆ نیشتمان بکەن".
ئاماژەی بەوەش کردووە، ئەمریکا و چین هاوکاریی ئێران دەکەن بۆ دەرهێنانی تۆزی ئەتۆمی.
