شەھباز شەریف، سەرۆک وەزیرانی پاکستان، لە لێدوانێکی نوێدا تیشکی خستە سەر ڕۆڵی وڵاتەکەی لە نێوەندگیری و هێورکردنەوەی ئاڵۆزییەکانی نێوان واشنتن و تاران.
سەرۆک وەزیرانی پاکستان ڕایگەیاند، کە ئەو ھەوڵە دیپلۆماسییانەی لەلایەن وڵاتەکەیەوە لە ماوەی ڕابردوودا دراون، ئەنجامی ئەرێنییان هەبووە و توانیویانە ئاستی گرژییەکانی نێوان ئەمریکا و کۆماری ئیسلامی ئێران بە شێوەیەکی بەرچاو کەم بکەنەوە.
شەھباز شەریف جەختی لەوەش کردەوە، کە پاکستان وەک وڵاتێکی کاریگەر لە ناوچەکەدا، پابەندیی تەواوی خۆی بە پاراستنی ئاشتیی ناوچەیی و جیھانی دووپات دەکاتەوە و بەردەوام دەبێت لە کارکردن بۆ دوورخستنەوەی مەترسییەکانی شەڕ و پێکدادان.
ئەم لێدوانانەی سەرۆک وەزیرانی پاکستان لە کاتێکدایە کە ناوچەکە بە قۆناغێکی هەستیاردا تێدەپەڕێت و وڵاتانی ناوچەکە هەوڵدەدەن لە ڕێگەی کەناڵە دیپلۆماسییەکانەوە ڕێگری لە هەر جۆرە پەرەسەندنێکی سەربازی بکەن کە کاریگەری نەرێنی لەسەر سەقامگیریی ئابووری و ئەمنیی گشتی هەبێت.
