فەرماندەیی گشتیی هێزە چەکدارەکانی ئوردن ڕایگەیاند، سیستەمی بەرگریی ئاسمانیی وڵاتەکەیان ڕووبەڕووی 6 مووشەک بووەتەوە کە لە خاکی ئێرانەوە بەرەو ئاسمانی شانشینی ئوردن ئاراستە کرابوون.
ئەمڕۆ چوارشەممە 22ـی تەمووز، سەرچاوەیەکی سەربازیی بەرپرس لە سوپای ئوردن ڕایگەیاند: سیستەمی بەرگریی ئاسمانی توانیویەتی 4 مووشەک لە ئاسماندا تێکبشکێنێت و بخاتە خوارەوە، هاوکات 2 مووشەکەکەی دیکە لە ناوچەی دوورەدەست و چۆڵ لە دانیشتووان کەوتوونەتە خوارەوە.
بەپێی زانیارییەکانی سوپا، ئەو مووشەکانەی کەوتوونەتە خوارەوە هیچ زیانێکی گیانی و ماددییان لێ نەکەوتووەتەوە. دوای ڕووداوەکەش، تیمەکانی فەرماندەیی ئەندازیاریی شاهانە گەیشتوونەتە شوێنی کەوتنی مووشەک و پاشماوەکانیان، بە مەبەستی پاککردنەوە و دڵنیابوونەوە لە سەلامەتی ناوچەکە بەپێی ڕێکارە تەکنیکی و ئەمنییەکان.
هێزە چەکدارەکانی ئوردن جەختیان لەوە کردووەتەوە کە ئاسمانی وڵاتەکەیان لەژێر چاودێرییەکی ورد و بەردەوامدایە، هەروەها ئاماژەیان بەوە کردووە کە بەپێی یاساکانی بەرگری، ڕووبەڕووی هەر هەڕەشەیەک دەبنەوە کە سەروەریی خاکی ئوردن و سەلامەتی هاووڵاتییانی بخاتە مەترسییەوە.
