ئاژانسەکانی هەواڵگریی ئەمریکا هۆشدارییان داوەتە یاریدەدەرە باڵاکانی دۆناڵد ترەمپ، سەرۆکی ئەمریکا، کە لەوانەیە ببنە ئامانجی هەڕەشە و هێرشە ئەگەرییەکانی کۆماری ئیسلامیی ئێران.
ڕۆژنامەی "وۆڵ ستریت جۆرناڵ" لە ڕاپۆرتێکدا کە پشتی بە چەند سەرچاوەیەکی ئاگادار بەستووە، بڵاوی کردەوە کە بەهۆی مەترسییە ئەمنییەکانەوە، لە لایەن دەزگا هەواڵگرییەکانەوە داوا لە بەشێک لە یاریدەدەرە باڵاکانی ترەمپ کراوە کە بەکارهێنانی خزمەتگوزارییە گشتییەکانی گواستنەوە و "ئۆتۆمبێلی کرێ" ڕابگرن، تاوەکو مەترسییەکانی سەر ژیانیان کەم بکرێتەوە.
ڕاپۆرتەکە ئاماژەی بەوە کردووە کە بەردەوامیی ململانێ سەربازییەکانی نێوان واشنتۆن و تاران تەنها لە چوارچێوەی سیاسی و سەربازیدا نەماوەتەوە، بەڵکو کاریگەرییەکی "کەسیی" گەورەی لەسەر دۆناڵد ترەمپ و بازنەی نزیکی دەسەڵاتەکەی لە کۆشکی سپی دروست کردووە. ئەم دۆخە وای کردووە ڕێکاری ئەمنیی توندتر بۆ پاراستنی بەرپرسانی ئەمریکا بگیرێتە بەر، چونکە تاران پێشتر چەندین جار هەڕەشەی تۆڵەسەندنەوەی لە سەرکردە ئەمریکییەکان کردووە.
ئەم هۆشدارییە هەواڵگرییانە لە کاتێکدا دێن کە ناوچەی ڕۆژهەڵاتی ناوەڕاست لە لێواری جەنگێکی گشتگیردایە. سوپای ئەمریکا شەوی ڕابردوو 13هەمین خولی بۆردومانە یەک لەدوای یەکەکانی بۆ سەر ئامانجە سەربازییەکانی ناو خاکی ئێران تەواو کرد. هاوکات سەرۆک ترەمپ هۆشداریی داوە کە هەر هێرشێکی ئێران بۆ سەر کەشتییەکان لە گەرووی هورمز، بە وێرانکردنی ژێرخانی پایتەختی ئەو وڵاتە وەڵام دەدرێتەوە.
چاودێرانی سیاسی پێیان وایە کە بە ئامانجگرتنی بەرپرسانی باڵا لە لایەن ئێرانەوە، ستراتیژییەکی "جەنگی سێبەرە" کە تاران دەیەوێت لە ڕێگەیەوە فشار بخاتە سەر ناوەندی بڕیار لە واشنتۆن. تاوەکو ئێستا نە کۆشکی سپی و نە لایەنی ئێرانی بە فەرمی لێدوانیان لەسەر ئەم ڕاپۆرتەی وۆڵ ستریت جۆرناڵ نەداوە.
