سەرۆکی ئەمریکا ڕایگەیاند، ئێران ئارەزوویەکی ڕاستەقینەی هەیە بۆ گەیشتن بە ڕێککەوتن، جەختیشی کردەوە کە هەر ڕێککەوتنێک بێتە ئاراوە لە بەرژەوەندی ئەمریکا و هاوپەیمانەکانیدا دەبێت.
ئەمڕۆ دووشەممە 1ـی حوزایران، دۆناڵ ترەمپ سەرۆکی ئەمریکا لە پەیامێکدا لە تۆری کۆمەڵایەتیی تروس، ڕەخنەی توندی لە دیموکراتەکان و هەندێک لە ئەندامانی پارتی کۆماری گرت و بە کەمی نیشتمانپەروەری وەسفی کردن. ناوبراو ئاماژەی بەوە کرد کە لێدوانە دژبەیەکەکانی سیاسییەکانی ناوخۆ کارەکەی ئەوی قورس کردووە بۆ ئەوەی بتوانێت بە شێوەیەکی گونجاو دانوستان بکات.
سەرۆکی ئەمریکا گوتی: سیاسییەکان بەردەوام دەنگەدەنگی نەرێنی دەکەن هەندێک دەڵێن خێرا بکە، هەندێکی تر دەڵێن هێواش بەرەوە، یان باس لە هەڵگیرساندنی جەنگ و دوورکەوتنەوە لێی دەکەن، ئەمەش لە ئاستێکدایە کە پێشتر هەرگیز نەبینراوە.
لە کۆتایی پەیامەکەیدا، ترەمپ داوای لە ڕەخنەگرانی کرد کە ئارام بگرن و گوتی: تەنیا دانیشن و پشوو بدەن، لە کۆتاییدا هەموو شتێک بە باشی چارەسەر دەبێت، وەک هەمیشە کە بەو شێوەیە بووە.
