دۆناڵد ترەمپ، سەرۆکی ئەمریکا، فشارەکانی بۆ سەر کۆمپانیاکانی نەوت چڕ کردەوە و داوای لێکردن دەستبەجێ نرخەکانی وزە لە بازاڕەکاندا دابەزێنن، ئەمەش دوای ئەوەی نرخی نەوت بەهۆی بارگرژییەکانی ناوچەکەوە ئاستێکی پێوانەیی تۆمار کرد.
سەرۆکی ئەمریکا لە لێدوانێکی نوێدا، کە ئاڕاستەیەکی هۆشداریدانی پێوە دیار بوو، ڕایگەیاند کە چیتر قبوڵکراو نییە نرخەکان لەم ئاستە بەرزەدا بمێننەوە. ترەمپ وتی: "پێویستە کۆمپانیاکانی نەوت دەستبەجێ نرخەکان دابەزێنن." ئەم داواکارییەی کۆشکی سپی لە کاتێکدایە کە نرخی یەک بەرمیل نەوتی خاوی برێنت لە بازاڕە جیهانییەکاندا بەربەستی 100 دۆلاری بڕیوە.
چاودێرانی ئابووری ئاماژە بەوە دەکەن کە بەرزبوونەوەی نرخەکان پەیوەندیی ڕاستەوخۆی بەو ململانێ سەربازییە توندەوە هەیە کە ماوەی دوو هەفتەیە لە نێوان ئەمریکا و ئێران لە گەرووی هورمزدا بەردەوامە. سەرەڕای ئەوەی ترەمپ فەرمانی داوە بە "وەستانی کاتیی" بۆردومانەکان، بەڵام گەمارۆ دەریاییەکەی ئەمریکا و هەڕەشەکانی تاران بۆ داخستنی ڕێڕەوە ئاوییەکان، دڵەڕاوکێیەکی زۆریان لە ناو بازاڕەکانی وزەدا دروست کردووە.
داواکارییەکەی ترەمپ وەک هەوڵێک دەبینرێت بۆ ڕێگریکردن لە هەڵاوسانی ئابووری لە ناوخۆی ئەمریکادا، بەتایبەتی کە بەرزبوونەوەی نرخی بەنزین کاریگەریی ڕاستەوخۆی لەسەر ژیانی هاوڵاتیان هەیە. شارەزایان پێیان وایە کە سەرۆکی ئەمریکا دەیەوێت بەم پەیامە "تۆپەکە بخاتە گۆڕەپانی کۆمپانیاکانی نەوتەوە" تاوەکو نیشانی بدات کە ئیدارەکەی هەموو هەوڵێک دەدات بۆ جێگیرکردنی بازاڕ، لە کاتێکدا کە ئۆپەراسیۆنە سەربازییەکانی وڵاتەکەی یەکێک لە هۆکارە سەرەکییەکانی ناسەقامگیریی نرخەکانن.
تاوەکو ئێستا کۆمپانیا گەورەکانی نەوت هیچ وەڵامێکی فەرمییان بۆ ئەم داواکارییەی دۆناڵد ترەمپ نەبووە، بەڵام بازاڕەکانی جیهان بە وریاییەوە چاودێریی لێکەوتەکانی ئەم گوشارە سیاسییە دەکەن.
